Þingmenn fylgjast með umræðum í þingsalnum í dag. mbl.is/Kristinn

Þingmenn stjórnarandstöðunnar segja nauðsynlegt, að fá skýringar á tölvupóstum, sem eru að berast fjárlaganefnd Alþingis þessa stundina. Um er að ræða pósta sem gengu á milli breskrar lögmannsstofu, íslensku Icesave-samninganefndarinnar og stjórnvalda fyrr á þessu ári.

Krefjast stjórnarandstæðingar þess að þingfundi verði frestað á meðan farið verði betur yfir gögnin.  

Gunnar Bragi Sveinsson, þingmaður Framsóknarflokksins, vitnaði í tölvupóst frá lögmannsstofunni Mishcon de Reya til formanns íslensku samninganefndarinnar, sem er dagsettur 1. júlí.  „Eftir heimsókn Össurar og fundinn með John í London," las Gunnar Bragi, og bætti við, að úr því Össur hafi margítrekað að hann kannist ekki við þessa lögfræðistofu, þá hljóti menn að velta því fyrir sér hvort þetta sé enn ein prentvillan, sem komi frá stofunni.

Gunnar Bragi las upp úr öðrum tölvupósti, sem er dagsettur 7. júlí: „Kæri Össur, ég vona að þér líði frábærlega vel."  „Hver segir svona við mann sem hann hefur aldrei hitt og veit ekki hver er?" spurði Gunnar Bragi og bætti við, að nauðsynlegt væri að varpað sé ljósi á misræmi í gögnum og fullyrðingum sem komið hafa fram. 

Björn Valur Gíslason, þingmaður VG, sagði að hafi einhverntíma orðið vendipunktur í Icesave-umræðunni þá hefði hann orðið þegar Gunnar Bragi las upp síðari tölvupóstinn.

„Ég get bætt við þessar upplýsingar úr svipuðum tölvupóstum þar sem sendandi segir: Hvenær kemur þú til London? Og svarið er: Klukkan 20 í kvöld. Þetta er tölvupóstur milli aðila sem eru óskyldir Mishcon de Reya. Sú lögfræðistofa er að dreifa tölvupóstum um allan heim sem henni kemur ekkert við," sagði Björn Valur.