Blóðug hópslagsmál brutust út í félagsheimilinu Logalandi í Borgarfirði í gærkvöldi. Ungmennafélagið Reykdælir stóð þar fyrir dansleik og samkvæmt upplýsingum frá einum stjórnarmanni í félaginu þá réðu starfsmenn á dansleiknum ekki við hóp manna sem kom þangað í öðrum tilgangi en að dansa.

„Hingað kom fjögurra manna hópur Skagamanna saman á bíl, buffaðir steraboltar eins og það er kallað, og höguðu sér afar dólgslega. Stofnuðu þeir til slagsmála og í rauninni má þakka fyrir að enginn stórslasaðist því slíkur var atgangurinn. Menn víluðu það ekki fyrir sér að standa uppi á borðum og sparka af alefli í höfuðið á næsta manni, enda fór einn gestanna nefbrotinn undir læknishendur,” segir Hafsteinn Þórisson, einn stjórnarmanna í Ungmennafélagi Reykdæla, í samtali við fréttavefinn Skessuhorn.

Allt upp í 20 manns hafi um tíma tekið þátt í í blóðugum slagsmálum þar sem menn skipuðu sér í fylkingar, en það er um tíundi hluti þeirra sem keyptu miða á dansleikinn.

„Í hópi dyravarða voru tveir fílefldir heimamenn, vanir dyravörslu, og varð það okkur happs. Annar þeirra er að vísu illa farinn í andliti og mun hann leggja fram kæru á hendur árásarmönnunum.”  Lögregla var ekki á staðnum en þegar hún kom voru slagsmál afstaðin og óeirðaseggirnir farnir í burtu.

Að sögn vitna sem voru á dansleiknum var talsverð ölvun og eitthvað um fíkniefnanotkun. Þá sagði Hafsteinn það áberandi að svokallaðir orkudrykkir hafi verið notaðir til að blanda vínið og greinilegt væri að það færi illa í fólk, að því er segir á vef Skessuhorns.

 Hér er hægt að lesa fréttina í heild á vef Skessuhorns