Wouter Bos, fjármálaráðherra, fagnar samþykkt Alþingis á Icesave-frumvarpinu og segir þetta góðar fregnir sem bárust á síðasta degi ársins. Hann segir að málið hafi ekki verið auðvelt en Íslendingar taki með þessu ábyrgð og því beri að hrósa. Fjölmargir hollenskir fjölmiðlar fjalla um samþykkt Alþingis, dagblöð, útvarp og sjónvarp.

Á vef breska dagblaðsins Independent er í dag ítarlega fjallað um Icesave-samkomulagið, háa innlánsvexti íslensku bankanna í Bretlandi á sínum tíma sem löðuðu að marga sparifjáreigendur og að Icesave-samkomulagið sé mjög umdeilt meðal íslensku þjóðarinnar.

Þar segir að með samkomulaginu fái ríkisstjórnir Bretlands og Hollands endurgreitt af láni sem veitt var íslenskum stjórnvöldum til að greiða tap yfir 320 þúsund viðskiptavina Landsbankans í Bretlandi og Hollandi.

Talsmaður breska fjármálaráðuneytisins sagði í gær að samþykkt Alþingis bindi enda á deilu ríkjanna og að bresk stjórnvöld fagni þessu skrefi sem íslenska ríkisstjórnin hafi stigið. Þetta, ásamt stuðnings frá Alþjóða gjaldeyrissjóðnum, Evrópusambandinu og norrænu ríkjunum muni gera Íslandi kleift að endurheimta traust á alþjóðlegum mörkuðum og að einbeita sér að því að ná efnahagsbata á ný.

Vísað er til orða Steingríms J. Sigfússonar, fjármálaráðherra um samþykkt frumvarpsins sé betri kostur en að hafna samkomulaginu og að það muni koma í veg fyrir enn frekari efnahagslegan skaða. Sagan muni sýna að stjórnvöld hafi gert rétt. 

Í frétt Independent er vísað til þess að Icesave-samkomulagið muni hins vegar ekki tryggja rétt breskra sveitarfélaga sem hafi átt yfir 900 milljónir punda, 182 milljarða króna, inn á reikningum íslensku bankanna. Innan við 10% af því fé hafi endurheimst.

Í síðasta mánuði mætti fjármálastjóri sambands breskra sveitarfélaga (LGA), Stephen Jones, á kröfuhafafund hjá Glitni en bankinn telji að kröfur sveitarfélaganna flokkist sem almennar kröfur en ekki forgangskröfur í þrotabú bankans. Það geti þýtt að sveitarfélögin fái ekki nema  um 25% upp í kröfur sínar. Á sama tíma sé litið á kröfur þeirra sem forgangskröfur í bú Landsbankans.

Í gær sagði talsmaður LGA við blaðamann Independent að ekkert hafi breyst hvað varðar deilur sambandsins við Glitni og að viðræður standi enn yfir. Eins og greint var frá í síðasta mánuði íhuga sveitarfélögin að fara í mál vegna málsins.

Grein De Telegraaf

Grein Independent í heild

Grein  Het Financieele Dagblad

Hollenska sjónvarpið og útvarpið 

Frétt Trouw

Frétt Volkskrant

Frétt NRC Handelsblad  á ensku

Frétt NRC Handelsblad