„Við styðjum vel ígrundaða ákvörðun forseta Íslands. Nú er komið að því að þjóðin taki ákvörðun,“ sagði Eiríkur S. Svavarsson, einn af talsmönnum Indefence-hópsins. InDefence muni  starfa „í sama anda“ og áður fram til kosninga um Icesave-lögin. 

„Starf InDefence-hópsins hefur miðað því að ná samstöðu meðal þjóðarinnar um sanngjarna lausn á Icesave-málinu í samræmi við Brussel-viðmiðin. Þrátt fyrir synjun forseta Íslands hafa lögin nú tekið gildi. Eins og forseti sagði í yfirlýsingu sinni gilda lögin að sjálfsögðu áfram verði þau samþykkti í þjóðaratkvæðagreiðslu. Verði úrslitin á annan veg eru engu að síður áfram í gildi lög númer 96, 2009, sem Alþingi samþykkti 28. ágúst sem fela í sér viðurkenningu Íslendinga á skuldbindingum sínum en þó með fyrirvörum,“ sagði Eiríkur.

Aðspurður um hvernig hann teldi að Hollendingar og Bretar muni bregðast við yrðu lögin felld, sagði Eiríkur að of snemmt væri að segja til um það. Bretar og Hollendingar hefðu hins vegar í höndunum samninga sem gengju algjörlega að kröfum þeirra, þ.e.a.s. þá sem nýju Icesave-lögin fjalla um. Sá samningur hafi tekið gildi en hann þurfi að bera undir þjóðaratkvæði. „Það er alltof snemmt að vera að velta því upp núna. Við þurfum að sjá svolítið hvaða atburðarrás tekur við núna, bara í rólegheitunum,“ sagði hann.