Gunnar Helgi Kristinsson prófessor. mbl.is/Ómar

Gunnar Helgi Kristinsson, prófessor, sagði í Sjónvarpinu, að Ólafur Ragnar Grímsson, forseti, hefði verið samkvæmur sjálfum sér þegar hann ákvað að synja lögum um ríkisábyrgð vegna Icesave staðfestingar.

Þá sagði hann, að það væri tilgáta forsetans, að þjóðaratkvæðagreiðsla muni skapa sátt um málið. Sagði Gunnar Helgi, að það væri þó ekki víst og vísaði m.a. til atkvæðagreiðslu um álver í Hafnarfirði fyrir nokkrum árum.

Eiríkur Tómasson, prófessor, sagði að það léki enginn stjórnskipulegur vafi á að forseti geti synjað lögum staðfestingar og engar hömlur væru á því í stjórnarskrá hvaða lögum væri hægt að synja.

Hann sagðist þó ekki viss um að þetta mál verði látið ganga til þjóðaratkvæðagreiðslu. Málið væri ekki vel til þess fallið og að auki hefðu Íslendingar átt í erfiðri deilu við nágrannaríki sín. Það verði erfitt fyrir hvern og einn Íslending að ganga til kjörborðsins og taka afstöðu.

Eiríkur sagðist vera bundinn trúnaði en hann vissi að í öllum milliríkjasamningum væru ýmsir hlutir undirliggjandi, sem ekki væri hægt að fjalla um opinberlega. Sagðist hann þykjast vita, að ef að tíminn hafi unnið með Íslendingum væri  möguleiki, þrátt fyrir þá skýru skilmála sem eru í Icesave-lögunum, að taka þá upp. Það myndi setja framtíðar ráðamenn Íslendinga í vanda, ef þjóðin samþykkti þessa skilmála í þjóðaratkvæðagreiðslu og því væri þetta mál ekki vel fallið til þjóðaratkvæðis.

Hann sagði, að til greina komi því, að Alþingi felli lögin úr gildi og freisti þess að taka upp samninga við Breta og Hollendinga að nýju. Þá sé auðvitað hugsanlegt að Bretar og Hollendingar og freisti þess að leita réttar síns fyrir dómstólum.

Gunnar Helgi Kristinsson sagði að ríkisstjórnin gæti gripið til róttækari aðgerða og sagt af sér í mótmælaskyni við ákvörðun forsetans. Þá væri það undir Ólafi Ragnari Grímssyni komið, að leysa stjórnarkreppu og hugsanlega gæti hann þá myndað utanþingsstjórn.