Toyota á Íslandi, umboðsaðili Toyota- og Lexusbifreiða, selur frá áramótum alla nýja bíla með 5 ára ábyrgð. Segir fyrirtækið, að 5 ára ábyrgðin sé eins og hefðbundin 3 ára verksmiðjuábyrgð Toyota Motor Europe á þeim bílum sem Toyota á Íslandi hafi selt hingað til en nú bætist 4. og 5. árið við og gildir ábyrgðin allt að 160.000 km akstri.
 
Fyrirtækið segir, að fáeinar undantekningar séu á ábyrgðinni á 4. og 5. ári frá því sem viðgengst fyrstu 3 árin þegar um sé að ræða búnað sem eðlilegt er að slitni á svo löngum tíma. Þessari auknu ábyrgð fylgi enginn kostnaður fyrir kaupandann.
 
Eigendum notaðra Toyota- og Lexusbifreiða gefst einnig kostur á að kaupa viðbótarábyrgð á bíla sína sem tekur við þegar 3 ára verksmiðjuábyrgð lýkur. Viðbótarábyrgðin er boðin í samstarfi við Tryggingamiðstöðina og er 2 ára viðbótartrygging með þeim sömu skilmálum og eru tilteknir í 4. og 5. ári fimm ára ábyrgðar Toyota Motor Europe. Frá og með 11. janúar 2010 verður hægt að kaupa 2 ára viðbótarábyrgðina hjá öllum viðurkenndum sölu- og þjónustuaðilum Toyota á Íslandi.

Kaupa má 2 ára viðbótarábyrgð á allar þær Toyota- og Lexusbifreiðar sem fluttar hafa verið inn af Toyota á Íslandi ef ekki eru liðin meira en 4 ár frá söludegi. Þá er ætlast til að bifreiðin hafi farið í gegnum þjónustuskoðanir þær sem tilgreindar eru í þjónustubók bifreiðarinnar.