Gísli Björnsson með barnið. Myndin er af vef SHA.

Sjúkraflutningamenn á Akranesi tóku í morgun á móti barni, sem lá á í heiminn. Mennirnir höfðu verið kallaðir í heimahús til að flytja konu á fæðingardeildina en þegar þangað var komið var fæðingin hafin.

Fram kemur á heimasíðu Sjúkrahúsins á Akranesi, að sjúkraflutningamennirnir Sigurður Már Sigmarsson, Skarphéðinn Magnússon og Gísli Björnsson hafi farið á staðinn. Síðan segir:

„Ekki var að sökum að spyrja þegar inn á heimilið var komið.  Konan, Birna Skarphéðinsdóttir stundi því upp að hún héldi að barnið væri að koma.  „Þá fæðir þú bara, góða mín”, svaraði Gísli og þóttist hvergi láta sér bregða enda þaulvanur bústörfum. "  

Haft er eftir Gísla, að hann hafi séð koll barnsins koma í ljós og strax gert sér grein fyrir að naflastrengurinn var vafinn um hálsinn á barninu og náð að snúa því.  Síðan hefði hann handleikið barnið eins og eftir bókinni.

„Þetta er sú mesta gleðistund sem ég hef upplifað í mínu starfi þegar ég heyrði strákinn fara að orga.  Þetta er fyrsta barnið sem ég tek á móti þótt oft hafi legið nærri og ánægjulegt að bæði móður og barni heilsast vel,” er haft eftir Gísla.

Þá segir að ekki megi á milli sjá, nýbakaði faðirinn Magnús Magnússon eða Gísli Björnsson.

Vefur SHA