Umfjöllun erlendra fjölmiðla um synjun forsetans á undirritun Icesavelaganna virðist heldur vera á mildari nótum í dag en í gær. Íslensk stjórnvöld hafa veitt erlendum miðlum fjölmörg viðtöl frá því að forsetinn synjaði lögunum undirritunar.

Töluvert er fjallað um málið í breskum fjölmiðlum í dag. Greinarhöfundur Daily Telegraph segir að almenn reiði hafi brotist út á Íslandi vegna þeirra ranginda sem bresk stjórnvöld hafi beitt þá með því að setja á þá hryðjuverkalög. Dálkahöfundur Financial Times segir Íslendinga hafa fundið kurteisa og hófsama leið til að lýsa andstöðu við að þurfa að greiða fyrir hroka og græðgi annarra.

Ríkisútvarpið BBC, dagblaðið Guardian og Reuters fréttastofan greina frá undirbúningi þjóðaratkvæðagreiðslu en í The Times er haft eftir aðstoðarfjármálaráðherra Bretlands, að málið geti haft mikil og neikvæð áhrif á alþjóðlegt samstarf Íslendinga. Athygli vekur að blaðið heldur því fram að sá skilningur ríki að breska fjármálaráðuneytið geti haldlagt eignir Landsbankans sem smám saman séu að skila sér.

Sömuleiðis stingur í stúf að Sky sjónvarpsstöðin breska segir enn í fyrirsögn að Ísland neiti að borga skuld sína við Breta, jafnvel þótt haft sé eftir aðstoðarmanni viðskiptaráðherra, að landið hafi fyllilega í hyggju að uppfylla skuldbindingar sínar.

Í The Wall Street journal segir að málið geti stefnt viðreisnaráætlun Íslands í hættu. Á vef blaðsins sem og vef Guardian er einnig hægt að kjósa um afstöðu lesenda til þess hvort Íslendingar eigi að borga Icesave skuldina eða ekki og virðist mikill meirihluti hallast að því að þeir eigi ekki að gera það. Geta lesendur hvar sem er í heiminum tekið þátt í kosningunni, einnig Íslendingar.

Hollenskir og norrænir fjölmiðlar fjalla einnig um málið og m.a. birtist forsíðuviðtal við Steingrím J. Sigfússon fjármálaráðherra í hollenska dagblaðinu de Volkskrant í dag. Steingrímur hefur einnig veitt AP og Reuters fréttaveitunum viðtöl sem og ljósvakamiðlunum BBC, ITN og Channel 4 þar sem hann var í beinni útsendingu í gærkvöld. Þá hefur hann rætt við breska dagblaðið Independent og norræna fjölmiðla. Þá hafa Össur Skarphéðinsson utanríkisráðherra og Gylfi Magnússon, efnahags- og viðskiptaráðherra einnig veitt viðtöl í Bretlandi og á Norðurlöndum í gær og í dag.