Gunnsteinn Sigurðsson, bæjarstjóri í Kópavogi, hefur ákveðið að gefa ekki kost á sér í væntanlegu prófkjöri Sjálfstæðisflokksins þar í bæ. Hann segist hafa metið málið og komist að þessari niðurstöðu sem grundvallist á því að togstreita sé í röðum sjálfstæðismanna í Kópavogi. Við þær aðstæður geti hann ekki hugsað sér að taka þátt í prófkjöri, þó að hann muni gegna embætti bæjarstjóra til vors.

„Mér hefur gengið vel að vinna með starfsfólki á bæjarskrifstofunum og bæjarfulltrúunum. Hins vegar hefur verið ókyrrð í Sjálfstæðisflokknum og upp hafa komið atburðir og aðstæður sem ég ber enga ábyrgð á,“ segir Gunnsteinn.

Hafi Gunnar I. Birgisson, fv. bæjarstjóri, og bakvarðasveit hans valdið ólgu í flokksstarfinu með ýmsum hætti. Þá hafi mál sem urðu til þess að Gunnar vék úr embætti sl. sumar reynst flokknum erfið; það er mál Lífeyrissjóðs Kópavogsbæjar og viðskipti bæjarfélagsins við fyrirtæki dóttur Gunnars.

„Við erfiðar aðstæður ríður á að allir standi saman og séu ekki að skylmast innbyrðis eins og er í Sjálfstæðisflokknum. Í bæjarstjórn hefur náðst samstarf þvert á flokka,“ segir Gunnsteinn.

„Það hefur verið friður í flokknum,“ segir Gunnar I. Birgisson. Hann neitar að hafa unnið gegn Gunnsteini. Raunar hafi það verið sín tillaga að hann tók við bæjarstjóraembættinu. Gunnar segir því þó ekki að leyna að hann sé ekki sáttur við allt í bæjarmálunum, s.s. að árshátíð bæjarstarfsmanna var blásin af og að eldri borgarar þurfi að greiða í sund. Að öðru leyti kveðst Gunnar ekki vilja tjá sig um málið enda sé hann í leyfi sem bæjarfulltrúi. sbs@mbl.is