Steingrímur J. Sigfússon mbl.is/Golli

Norðurlöndin, í það minnsta Noregur, og Alþjóðagjaldeyrissjóðurinn, munu halda áfram með efnahagsáætlun sína með Íslandi, þrátt fyrir að forseti Íslands hafi neitað að staðfesta Icesave lögin. Þetta kom fram í norskum fjölmiðlum eftir fund Steingríms J. Sigfússonar fjármálaráðherra með norskum ráðamönnum í morgun. Aftenposten.no greinir frá þessu í forsíðufrétt, þar sem segir í fyrirsögn að Íslendingurinn hafi fengið það sem hann vildi, í heimsókninni til Noregs.

Steingrímur eyddi morgninum í Noregi og fór þar á fund fjármálaráðherra Noregs, Sigbjörns Johnsen. Því næst hitti hann Jonas Gahr Störe utanríkisráðherra, til að ræða þá stöðu sem upp er komin vegna synjunar forsetans á Icesave-lögunum.

Segir í frétt Aftenposten að Steingrímur sé afar þakklátur fyrir að lánveitingarnar raskist ekki fram að þjóðaratkvæðagreiðslunni í febrúar. „Það er engin tilviljun að ég kom fyrst til Noregs," sagði hann eftir fundinn með Jonas Gahr Störe, utanríkisráðherra.

Hann var spurður hvers vegna Íslendingar ættu að borga fyrir mistök örfárra bankamanna. „Hvers vegna er heimurinn ekki réttlátur?" svaraði Steingrímur þá að bragði

Jonas Gahr Störe vildi eftir fundinn ekki tjá sig um það hvað Norðmenn gera í þessum lánamálum, ef svo fer að Íslendingar felli Icesave-lögin í þjóðaratkvæðagreiðslu.

Steingrímur var spurður hvort ríkissstjórnin myndi sitja áfram ef svo færi. „Það er of snemmt að segja til um nú," svaraði Steingrímur því.

Ekki náðist í Steingrím eftir fundina en samkvæmt upplýsingum úr fjármálaráðuneytinu sagði Steingrímur að fundirnir hefðu verið mjög jákvæðir. Sérstaklega hefði verið gríðarlega mikill áhugi norskra fjölmiðla á að fjalla um Icesave-málið og Ísland, en eftir fundina með ráðherrunum hitti hann norska fjölmiðla.

Steingrímur er nú á leið til Kaupmannahafnar, þar sem hann mun hitta Claus Hjort Frederiksen fjármálaráðherra Danmerkur. Steingrímur er væntanlegur aftur til landsins seint í kvöld.