Bjarni Benediktsson mbl.is/Ómar

Bjarni Benediktsson, formaður Sjálfstæðisflokks, sagðist ekki eiga von á því að mikill ágreiningur væri að ræða um lagafrumvarpið um þjóðaratkvæðagreiðslu. „Það er erfitt að ræða þetta frumvarp án þess að setja hlutina í heildarsamhengi og ræða samningana sjálfa sem bera á undir þjóðina og það hvað við í stjórnarandstöðu höfum verið að segja í kjölfar synjunar,“ sagði Bjarni.

Bjarni benti á að stjórnarandstaðan hefði lagt áherslu á að synjunin veitti tækifæri til þess að koma sjónarmiðum Íslands á framfæri, þar á meðal að Íslendingum beri ekki lagaleg skylda til þess að greiða skuldirnar.

„Það stendur sko aldeilis ekki á okkur að fara í þjóðaratkvæðagreiðslu um þetta mál. Þjóðin mun greiða atkvæði með hagsmunum sínum í þessu máli og hagmunir Íslands munu aldrei felast í því að greiða atkvæði með þvingunum og kúgun,“ sagði Bjarni. Tók hann fram að sér þætti dapurlegt að ríkisstjórnin hafnaði samstöðu með stjórnarandstöðunnar gegn þeirri kúgun þeirra ríkja sem harðast sækja fram í málinu.

Sagði hann óskiljanlegt að ekki væri lögð aukin áhersla á það að fara með málið fyrir dómstóla og láta reyna á réttarstöðu okkar. Sagði hann ekki hægt að saka Íslendinga um að hafa ekki sýnt sanngirni, þar sem Alþingi hafi m.a. boðið ríkisábyrgð. Hann sakaði viðsemjendur Íslendinga um óbilgirni og skort á sanngirni. 

„Látum það ekki gerast að við getum á árinu 2010 ekki staðið saman um hagsmuni Íslendinga. Hættum að einblína á hvernig við erum komin í þessa stöðu. Meginábyrgðin liggur hjá eigendum og stjórnendum bankanna. Vilji menn nota dýrmætan tíma okkar í þinginu um að eiga umræðu um aðdraganda um þetta mál í stað þess að ræða hvernig megi leysa það, þá óska ég þeim góðs gengis. Nú er tækifæri til þess að standa saman.“

Össur Skarphéðinsson, utanríkisráðherra, sagðist reiðubúinn að ná sáttum en ekki væri að heyra á ræðu formanns Sjálfstæðisflokks að hann vildi sættir. Össur minnti á að aldrei hefði í sögu lýðveldisins verið talað við jafnmarga ráðherra og fulltrúa annarra ríkja til þess að koma málstað Íslendinga á framfæri. 

Össur kallaði eftir því að Bjarni talaði skýrt um hvað það væri sem hann vildi, því það væri alls ekki skýrt þar sem hann væri stöðugt að skipta um skoðun um hvernig afgreiða ætti Icesave-málið. 

Bjarni spurði á móti hvað ríkisstjórnin vildi. „Ég hef verið talsmaður þess að við leituðum sátta, en takist það ekki er þá ekki augljóst að fara eigi dómstólaleiðina. Það er engin mótsögn í þessu. Vilji menn ekki láta reyna að samstöðu í málinu þá er sjálfsagt að fara með málið í þjóðaratkvæðagreiðslu þar sem þjóðin mun senda ríkisstjórninni skýr skilaboð.“

Össur Skarphéðinsson Kristinn Ingvarsson