Fangaklefar á Litla-Hrauni. Mynd úr safni. mbl.is/Ómar

Eftir Jón Pétur Jónsson

Íslensk og brasilísk stjórnvöld hafa að undanförnu átt í viðræðum hvort gera eigi tvíhliða samning um flutning dæmdra manna. Dómsmálaráðherra fjallaði um málið á ríkisstjórnarfundi í morgun. Hann segir að málið sé á byrjunarstigi.

Ragna Árnadóttir, dómsmála- og mannréttindaráðherra, segir í samtali við mbl.is að málið sé í vinnsluferli. 

Þrír Íslendingar sitja nú fangelsi í Brasilíu og að sögn Rögnu er aðbúnaður þeirra misjafnlega góður. Nú sé unnið að því að fá staðfestar upplýsingar um ástand og aðbúnað þeirra. 

„Hingað til hafa íslensk stjórnvöld ekki neitað því að taka við íslenskum ríkisborgurum sem hafa framið brot erlendis. Við höfum ekki neitað föngum að koma hingað til að afplána, ef það er á annað borð hægt að taka við þeim,“ segir hún.

„Við munum leitast við að að reyna fá þá heim til afplánunar ef aðstæður krefjast þess,“ segir ráðherra. Hún bendir á að meginreglan sé sú að brotamenn afpláni í því landi sem brotin séu framin og viðkomandi dæmdir.

„Hins vegar ef einhver sérstök mannúðarsjónarmið mæla með því að þeir verði fengnir heim til afplánunar þá munum við að sjálfsögðu skoða það. Það er að segja taka tillit til aðstæðna hverju sinni. Þá er mál hvers og eins skoðað fyrir sig. Þannig að við erum ekki með afdráttalausar reglur.“

Ragna bendir hins vegar á að brasilísk stjórnvöld verði að samþykkja slíkan flutning. Þetta sé ekki ákvörðun sem íslensk yfirvöld geti tekið einhliða.

Ragna Árnadóttir, dómsmála- og mannréttindaráðherra. mbl.is/Kristinn