Enn er viða hált. Mynd úr safni. mbl.is/RAX

Vegagerðin varar fólk eindregið frá því að reyna að fara Lágheiði, þar sem hún sé álitin áfær vegna flughálku. Einnig er mikil hálka víða á Vestfjörðum, svo sem í Mikladal og á Hrafnseyrarheiði.

Þá eru vegfarendur varaðir við miklu hvassviðri á Suðurlandi og Reykjanesi um miðjan dag. Varasamt geti verið að vera á ferð undir Eyjafjöllum, Hafnarfjalli, Kjalanesi og Reykjanesbraut.

Eftirfarandi er tilkynning frá Vegagerðinni frá því klukkan tuttugu mínútum fyrir tíu:

„Lokað
Suðurlandsvegur við Bláfjallaafleggjara er lokaður um óákveðinn tíma vegna umferðaróhapps.

Aðvörun
Vegfarendur eru varaði við miklu hvassviðri á Suðurlandi og Reykjanesi um miðjan dag í dag og gæti verið vara samt að vera á ferð undir Eyjafjöllum, Hafnarfjalli, Kjalanesi og Reykjanesbraut.

Lágheiði er álitin ófær vegna flughálku og fólki er eindregið ráðið frá því að reyna að fara yfir heiðina.

Færð
Á Suðurlandi eru vegir auðir.

Á  Vesturlandi er hálka á Bröttubrekku, aðrar leiðir eru auðar.

Á Vestfjörðum er flughált  á Hrafnseyrarheiði,  hálka á Steingrímsfjarðarheiði en hálkublettir um Þröskulda, á Dynjandisheiði , Mikladal og Hálfdán.

Aðalleiðir eru auðar á Norðurlandi allt austur fyrir Mývatn en hálka er yfir Mývatnsöræfi og Möðrudalsöræfum.

Á Austurlandi eru hálkublettir á Vopnafjarðarheiði og Fjarðarheiði en aðrar leiðir greiðfærar. Þoka er á Oddskarði.

Ásþungi
Vakin er athygli á að þungatakmarkanir eru víða á Suður- og Suðausturlandi, og eins á Vesturlandi.

Vegna hættu á slitlagsskemmdum verður viðauki 1 felldur úr gildi á eftirtöldum leiðum frá kl. 08:00 fimmtudaginn  21. janúar:
Djúpvegi nr. 61, frá vegamótum Vestfjarðavegar í Gautsdal að Flugvallarvegi í Skutulsfirði, Innstrandavegi nr. 68 frá þjóðvegi 1 í Hrútafirði að Djúpvegi í Steingrímsfirði, Strandavegi 643 og Drangsnesvegi 645 frá Staðará í Steingrímsfirði að Drangsnesi.

Viðauki 1 fellur úr gildi kl. 08:00 fimmtudaginn 21.janúar á vegum í Húnavatnssýslum og Skagafirði og einnig á Hringvegi frá Skagafirði að vegamótum  Dalvíkurvegar og Hringvegar norðan Akureyrar.“