Vinningshafinn er rúmum fimm milljónum króna ríkari. mbl.is/Golli

Týndur lottóvinningshafi er kominn í leitirnar, en um er ræða rétt rúmlega fimmtugan fjölskylduföður sem vann rúmar fimm milljónir króna. Það tók hins vegar sinn tíma að hafa uppi á vinningshafanum, sem hafði fimm rétta í úrdrættinum þann 9. janúar sl.

Íslensk getspá sendi út tilkynningu í fjölmiðla fyrir síðustu helgi í þeim tilgangi að hafa uppi á vinningshafanum, sem hafði keypt miða í söluturninum Tröllinu í Spönginni í Reykjavík.

Tilkynningin skilaði tilætluðum árangri, því maðurinn hafði samband. 

„Hann minnti að hann hefði keypt miða á þessum tiltekna sölustað en þar sem hann lá og las blaðið sitt á sunnudaginn nennti hann ekki að standa upp og gá í veskið sitt.  Hann mundi svo aftur eftir miðanum þegar hann var að keyra eftir Breiðholtsbrautinni í gær og ákvað að hringja í Getspá til að athuga að gamni sínu hvort vinningsmiðinn væri fundinn og fékk þau svör að svo væri ekki,“ segir í tilkynningu frá Íslenskri getspá.

„Starfsmaðurinn spurði hvort hann væri með miðann í höndunum og bað hann að lesa upp númerið á honum. Það var slegið inn í kerfið og það var ekki um það að villast að þarna var „týndi“ miðinn kominn í leitirnar með vinningi upp á rúmlega 5 milljónir króna.

Starfsmaður sagði við manninn að það væri góður vinningur á miðanum og spurði hvort hann væri tilbúinn að fá fréttirnar. Það kom smá þögn í símann áður en maðurinn sagði: „bíddu aðeins, ég ætla að leggja bílnum fyrst“. Og það var eins gott að hann gerði það því að þessar fréttir komu honum virkilega á óvart og hann var góða stund að jafna sig á þeim fréttum að hann væri orðinn Lottómilljónamæringur.

Hann var ennþá hálf titrandi yfir fréttunum þegar hann kom í afgreiðslu Getspár seinna um daginn með miðann en var þó alveg búinn að ákveða að hann ætlar að njóta lífsins fyrir vinninginn – og kannski borga smá skuldir,“ segir í tilkynningu.