Selfosskirkja Ómar Óskarsson

Fimm umsækjendur eru um embætti prests í Selfossprestakalli,  Suðurprófastsdæmi. Frestur til að sækja um embættið rann út  á mánudag. Embættið veitist frá 1. mars 2010.

Umsækjendur eru: Ása Björk Ólafsdóttir, Óskar Hafsteinn Óskarsson,    Ragnheiður Karítas Pétursdóttir, Stefán Einar Stefánsson og  Þráinn Haraldsson.

Biskup Íslands skipar í embættið til fimm ára að fenginni umsögn valnefndar. Valnefnd skipa níu manns úr prestakallinu ásamt prófasti Suðurprófastsdæmis.

Samþykkt var á almennum safnaðarfundi á Selfossi á sunnudag að krefjast þess af biskupi, að presti sem taka á til starfa í Selfossprestakalli verði falið að stýra og bera ábyrgð á öllu kirkjustarfi í Selfosskirkju. Ágreiningur var um tillöguna en hún samþykkt með 64 atkvæðum gegn tíu.

Þar sem fleiri en einn prestur starfa innan sömu sóknar skal, samkvæmt starfsreglum, verkaskipting fara fram undir forystu sóknarprests. Séra Kristinn Ágúst Friðfinnsson, sóknarprestur í Selfossprestakalli, á ekki von á öðru en svo verði áfram. Lög og starfsreglur kveði á um ábyrgð sóknarpresta og hann segist ekki skorast undan þeim skyldum. Hann beri ábyrgð á starfi sem fram fer í kirkjum prestakallsins.

Fjölmenni var á safnaðarfundinum sem var boðaður vegna nýlegrar sameiningar Selfossprestakalls og Hraungerðisprestakalls. Hart var deilt á hvernig sú sameining kom til, en hún var ákveðin á kirkjuþingi í nóvember síðastliðnum.