Skuldbreyting lækki greiðslubyrði um 407 milljónir
Bæjarstjórn Álftaness á fundi. Kristinn Ingvarsson
Í skýrslu, sem meirihluti bæjarstjórnar Álftaness hefur afhent eftirlitsnefnd með fjármálum sveitarfélaga um fjárhagslega endurskipulagningu sveitarfélagsins, er m.a. lagt til að leitað verði eftir samningum við Arion banka um að endurfjármagna yfirdrátt og öll lán með einu langtímaláni. Við þetta myndi greiðslubyrði af lánum minnka um 407 milljónir á þessu ári.
Skýrslan var samþykkt á bæjarstjórnarfundi í gærkvöldi og afhent eftirlitsnefndinni í dag. Í skýrslunni kemur fram, að þrátt fyrir tillögur um hagræðingu í rekstri og skuldbreytingar lána og niðurfellingu skuldbindinga geti sveitarfélagið ekki skilað hallalausum rekstri eða staðið við skuldbindingar sínar.
Heildarskuldir sveitarfélagsins voru í árslok 2009 voru um 3 milljarðar króna og þar af eru skammtímaskuldir og eingreiðslulán upp 1,2 milljarða króna. Uppgreiðsluverð allra lána og yfirdráttur hjá bankanum þann 31 desember var 663 milljónir króna.
Lagt er til í skýrslunni, að leitað verði eftir samningum við Arion banka um að endurfjármagna yfirdrátt og öll lán með einu langtímaláni til 23 ára og fyrstu þrjú árin verði eingöngu greiddir vextir.
Auk yfirdráttar að fjárhæð 101 milljón króna er Álftanes með 15 lánasamninga en lánin voru tekin á tímabilinu 1996 fram í ágúst 2009. 10 lánanna eru í erlendri mynt og bera breytilega vexti sem um s.l. áramót voru bilinu 1,05% - 2,70%. 5 lánanna eru í íslenskum krónum. Tvö þeirra eru verðtryggð og bera 5,56% -5,65% fasta vexti. 3 lánanna eru óverðtryggð með 9,5%-11,75% vöxtum. Þessi lán eru með einn gjalddaga á vormánuðum 2010. Uppgreiðsluverð þessara þriggja eingreiðslulána er um 200 milljónir króna.
Miðað við óbreytta stöðu er greiðslubyrði Álftaness af lánum á þessu ári rúmar 443 milljónir króna en verður 40 milljónir með skuldbreytingu.
Í skýrslunni segir, að þrátt fyrir tillögur um hagræðingu í rekstri og skuldbreytingar lána og niðurfellingu skuldbindinga við félögin Búmenn og Ris, geti sveitarfélagið ekki skilað hallalausum rekstri eða staðið við skuldbindingar sínar. Sveitarfélagið þurfi því annað hvort að að tryggja sér framlög frá ríkissjóði eða selja eignir til þess að gera sveitarfélagið hæft til sameiningar við annað sveitarfélag.
Segir að til þess að losna undan skuldbindingum við Eignarhaldsfélagið Fasteign þurfi að lágmarki 1,9 milljarða króna til þess að kaupa eignirnar sem samningur við félagið nær til.
