Frá Urriðaholti. Guðmundur Rúnar Guðmundsson

Héraðsdómur Reykjavíkur hefur dæmt að félag, sem keypti tvær byggingarlóðir í Urriðaholti í Garðabæ árið 2008, geti ekki rift kaupsamningnum þótt verðfall hafi orðið á lóðunum í kjölfarið. Verðið á lóðunum var 24 milljónir króna.

Byggingarsvæðið í Urriðaholti var í eigu félagsins Urriðaholt ehf. sem aftur var í eigu Oddfellowreglunnar á Íslandi og Viskusteins ehf. Félagið gerði samning við Garðabæ um uppbyggingu svæðisins.

Félagið Kvikur keypti í ágúst 2008 tvær byggingarlóðir af Urriðaholti ehf. Verðið var 24 milljónir og voru greiddar 5 milljónir við undirskrift kaupsamnings, 17 milljónir áttu áttu að greiðast á næstu átta mánuðum og 2 milljónir ári eftir að lóðirnar yrðu byggingarhæfar.

Við hrun viðskiptabankanna var Kvikum neitað um fjármögnun til kaupanna. Félagið vísaði einnig til þessa, þegar það óskaði eftir því við Urriðaholt ehf. í nóvember 2008 að kaupunum yrði rift. Einnig var vísað til þess, að fjöldi kaupenda lóða í Urriðaholti hefði hætt við framkvæmdir og skilað lóðum til Garðabæjar; einungis örfá hús af 1630 íbúðum hafi verið byggð. Hafi sveitarfélagið Garðabær fallist á að taka við lóðum frá þeim sem keyptu lóðirnar beint frá bænum. 

Urriðaholt hafnaði riftunarkröfu en Kvikur rifti samningnum einhliða í desember og krafðist endurgreiðslu á milljónunum 5, sem greiddar voru við undirskrift kaupsamningsins. Taldi félagið að forsendur fyrir kaupunum hefðu brostið. Urriðaholt hafnaði þessu og fóru félögin því í mál þar sem Urriðaholt krafðist þess að Kvikur greiddi 17 milljóna eftirstöðvar en Kvikur krafðist endurgreiðslu á 5 milljónum.

Héraðsdómur segir í niðurstöðu sinni, að í kaupsamningnum sé kveðið á um að áhætta af eign flytjist frá seljanda til kaupanda við afhendingu; þetta sé raunar ráðandi regla við sölu fasteigna.

Þá hafi forsvarsmenn Kviks vitað í ágúst 2008, að samdráttur var í sölu á fasteignum. Ætla verði að samningi um kaup á fasteign verði ekki vikið til hliðar vegna almenns verðfalls á fasteignum frekar en almenn hækkun á fasteignum víki til hliðar samningi um sölu á fasteign.