Varðskipið Ægir. Landhelgisgæslan

Varðskipsmenn á Ægi fóru um borð í tuttugu og tvö skip og báta í síðustu eftirlitsferð skipsins 7. - 26. janúar. Mælingar á afla voru undir viðmiðunarmörkum í sex bátum og leiddi það til fjögurra skyndilokana. Þrír skipstjórar áminntir þar sem ekki voru haffæris- eða réttindaskírteini um borð.

Auk þess var ein kæra var gefin út þar sem enginn stýrimaður var í áhöfn, samkvæmt upplýsingum Landhelgisgæslunnar.

Í ferðinni var einnig skipt um öldumælidufl út af Kögri. Duflið kom um borð í Ægi með Líf þegar haldin var fyrsta æfing skipsins með HIFR- búnað. Hann er notaður er til eldsneytistöku þyrlu á flugi. Vel gekk að skipta um duflið þrátt fyrir óhagstætt veður.

Aðeins 10 mínútur liðu frá því að léttbáturinn fór með nýja duflið frá varðskipinu, þar til báturinn kom til baka með gamla duflið. Hlustað var eftir sendingum þess og virkaði allt eins og það átti að gera. Meðan á þessu stóð var sem fyrr segir óhagstætt veður, austan 20-30 hnútar, mikil rigning og 2-3 metra ölduhæð.

Tveimur dögum síðar var siglt að Seley sem er um 2,5 sjómílur frá mynni Reyðarfjarðar. Þar var skipt um stefnunema í sjálfvirkri veðurstöð við vitann í Seley. Veðurstöðin er rekin af Siglingastofnun.

Þokkalegar aðstæður voru á staðnum og fóru fjórir menn á léttbát frá varðskipinu og voru þeir komnir til baka rétt um klukkustund síðar, höfðu þá lokið við að skipta um nemann. Var þá haft var samband við starfsmenn Siglingastofnunar sem staðfestu að vindstefna væri nú rétt frá stöðinni en rangar upplýsingar höfðu borist í langan tíma.

Ýmsar æfingar og þjálfanir fóru fram í ferð skipsins og má þar nefna nætur- og dagæfingar með þyrlum Landhelgisgæslunnar þar sem m.a. gerðar voru hífingar af skipi, úr björgunarbát og sjó, einnig þar sem þyrla tekur eldsneyti á flugi, verkleg æfing í „skipið yfirgefið“ auk reykköfunar- og slökkviæfingar sem fór fram um borð í bát sem var við bryggju á Eskifirði. Í ferðinni notuðu kafarar einnig tækifærið til æfinga m.a. á Aðalvík og í Stórhólma Reyðarfirði.

Þetta er aðeins brot af verkefnum Ægis, að sögn Landhelgisgæslunnar og má sjá að verkefni varðskipsmanna eru afar fjölbreytt og birtast í hinum ýmsu myndum.