Bygging Evrópuráðsins í Strassborg. mbl.is/GSH

Vaxandi skilnings gætir meðal annarra þjóða á aðstæðum á Íslandi og stöðu mála hvað varðar samningaviðræður íslenskra stjórnvalda við bresk og hollensk stjórnvöld í Icesave-deilunni.

Þetta kom fram á fundum íslenskrar þingnefndar, sem sótti fund Evrópuþingsins sem fram fór í Strassborg, með þingmönnum frá Norðurlöndunum og Þýsklandi, að því er segir í tilkynningu.

„Fundur Evrópuráðsþingsins fór fram dagana 25.-29. janúar í Strassborg. Fundinn sóttu fyrir hönd Íslandsdeildar Evrópuráðsþingsins Lilja Mósesdóttir formaður, Steinunn Valdís Óskarsdóttir varaformaður og Birkir Jón Jónsson.
 
Á meðan á Evrópuráðsþinginu stóð hitti þingmannasendinefnd Íslands þingmenn frá Norðurlöndunum og Þýskalandi á tvíhliða fundunum. Tilefnið var að gera grein fyrir stöðu mála á Íslandi eftir að forseti Íslands synjaði lögum um ríkisábyrgð lána frá Bretlandi og Hollandi til að borga innstæðueigendum Landsbankans í löndunum tveimur staðfestingar.
 
Á fundunum var undirstrikað að íslensk stjórnvöld muni standa við alþjóðlegar skuldbindingar sínar. Hins vegar var bent á að samningarnir, einkum lánakjörin, þættu ekki taka nægilegt tillit til svokallaðra Brussel-viðmiða sem sett voru fram þegar Frakkar fóru með formennsku í Evrópusambandinu. Viðmiðin kváðu á um að við gerð samninganna skyldi tekið tillit til þeirra fordæmalausu aðstæðna sem ríktu á Íslandi.
 
Á fundinum var einnig gerð grein fyrir þeirri efnahagsáætlun sem íslensk stjórnvöld framfylgja vegna lánanna frá Alþjóðagjaldeyrissjóðnum (AGS) og Norðurlöndunum. Undirstrikað var að lánin frá Norðurlöndunum færu ekki í að borga skuldir heldur til að styrkja gjaldeyrisforða landsins. Markmið lántökunnar væri að koma í veg fyrir frekari gengislækkun krónunnar þegar gjaldeyrishöftum verður aflétt. Norrænu þingmennirnir voru jafnframt upplýstir um tafir á endurskoðun AGS á efnahagsáætluninni.
 
Á fundunum gætti vaxandi skilnings á aðstæðum á Íslandi og stöðu mála hvað varðar samningaviðræður við bresk og hollensk stjórnvöld. Undantekningalaust var spurt hvað viðkomandi þingmannasendinefnd gæti gert fyrir Ísland sem sýndi aukinn vilja til að leggja Íslandi meira lið,“ segir í tilkynningunni.