„Þeir vildu fá að vita hvers vegna við erum svo áhugasöm um að fá fé okkar til baka. Ég mun útskýra það fyrir þeim, enn einu sinni. Allir eru að leita að lausn. Ef til vill hafa Íslendingarnir eina í bakhöndinni,“ sagði Wouter Bos, fjármálaráðherra Hollands, og vísaði til fulltrúa Íslands í aðdraganda fundarins með Paul Myners, bankamálaráðherra Bretlands, og formönnum þriggja íslenskra stjórnmálaflokka í Haag í gær.

Fundað var í hollenska fjármálaráðuneytinu og hvikaði Bos þar ekki frá þeirri kröfu hollenskra stjórnvalda að Ísland greiði 1,3 milljarða evra lán vegna Icesave að fullu.

Leyndarhjúpur yfir viðræðum

Mikil leynd hvíldi yfir fundinum og herma heimildarmenn Morgunblaðsins á hollenskum dagblöðum að þar viti menn lítið meira um efni viðræðnanna en fram hefur komið í stuttum viðtölum við ráðherrann.

Fundinn sátu fyrir Íslands hönd þeir Steingrímur J. Sigfússon fjármálaráðherra, Bjarni Benediktsson, formaður Sjálfstæðisflokksins, og Sigmundur Davíð Gunnlaugsson, formaður Framsóknarflokksins, ásamt fulltrúa Össurar Skarphéðinssonar utanríkisráðherra.

Samkvæmt heimildum Morgunblaðsins var um upplýsingafund en ekki samningafund að ræða, þar sem samningsaðilar skiptust á skoðunum en könnuðu ekki afstöðu til einstakra samningsmarkmiða, á borð við vaxtakjör af Icesave-láninu, en heimildir blaðsins höfðu áður hermt að áhersla yrði lögð á vaxtastigið.

Litlar væntingar Hollendinga

David Bremmer, blaðamaður hjá Algemeen Dagblad, ræddi við fulltrúa hollenskra stjórnvalda fyrir fundinn og var það tilfinning hans að væntingarnar væru ekki miklar. Frá sjónarhóli hollenskra stjórnvalda væri tilgangurinn fyrst og fremst að fá skýrslu um stöðuna á Íslandi.

Frekari fundarhöld hafa ekki verið ákveðin en samkvæmt heimildum blaðsins er litið svo á að Bretar séu ráðandi um framvindu málsins af hálfu ríkjanna tveggja.

Þá herma heimildir blaðsins að Hollendingar reikni ekki með því að málið fari fyrir dómstóla en sá möguleiki hefur verið reifaður með lagalegum rökum af íslenskum lögspekingum undanfarið.

Áhersla hollenskra fréttavefsíðna á málið síðdegis í gær vitnar um hversu miklu smærra mál það er í hollenskum stjórnmálum en íslenskum en samgöngumál í Amsterdam og hugsanleg skattlagning á efnafólk þóttu þá meira fréttaefni.