Ríkissaksóknari hefur höfðað mál á hendur fyrrverandi Starfsmanni Sláturfélags Suðurlands fyrir ærumeiðandi móðganir og aðdróttanir í garð forstjóra félagsins, sem birtust á nafnlausri vefsíðu.

Steinþór Skúlason, forstjóri Sláturfélags Suðurlands, segir í tilkynningu að rógsherferð hafi verið rekin gegn félaginu og stjórnendum þess frá því í febrúar 2008 á erlendri vefsíðu. Þar hafi nafnlausir aðilar vegið að Sláturfélagi Suðurlands og stjórnendum þess úr launsátri undir því yfirskini að þeir væru starfsmenn félagsins. Allt frá upphafi hafi verið ljóst að svo var ekki.

Steinþór segir, að netið hafi í síauknum mæli verið misnotaður til ærumeiðinga og rógsherferða í skjóli nafnleyndar. Því miður hafi það reynst þeim, sem  verði fyrir slíkum árásum nær ómögulegt að staðreyna hver ber ábyrgð á því efni sem þar sé birt þannig að þeir geti staðið vörð um mannréttindi sín.

Í tilkynningunni segir síðan:

„Hafa hlutaðeigendur orðið að reiða sig á að rannsókn lögreglu skili árangri, en ljóst er að heimildir hennar til að afla upplýsinga um höfunda efnis á internetinu mættu vera skýrari og viðameiri þannig að stemma megi stigu við afbrotum sem þessum. Engu að síður tókst embætti lögreglustjóra höfuðborgarsvæðisins að ljúka rannsókn þess máls sem hér um ræðir með fullnægjandi hætti þannig að taka mætti ákvörðun um útgáfu ákæru.

Embætti ríkissaksóknara hefur nú upplýst að með ákæru, dags. 14. janúar sl. hafi verið höfðað sakamál á hendur Oddi E. Friðrikssyni fyrir ærumeiðandi móðganir og aðdróttanir í garð undirritaðs. Málið verður þingfest fyrir Héraðsdómi Reykjavíkur miðvikudaginn 3. febrúar næstkomandi.

Ákærði gegndi starfi sölumanns hjá SS en lauk störfum í byrjun febrúar 2008 skömmu áður en rógsherferðin hófst."