Sophia Hansen kemur til dómþingsins í dag. mbl.is/Árni Sæberg

Dóttir Sophiu Hansen kom ekki til landsins í tengslum við opinbert mál, sem höfðað hefur verið gegn Sophiu fyrir fjársvik. Dóttirin, Rúna, bar þess í stað vitni gegnum síma í Héraðsdómi Reykjavíkur í morgun.

Til stóð að Rúna kæmi til landsins til að bera vitni en ákæruvaldinu var í gær tilkynnt að ekki yrði af því. Hún bar hins vegar vitni símleiðis í morgun. Hún talaði tyrknesku en dómtúlkur var í réttarsalnum.

Um er að ræða mál, sem teygir anga sína aftur til ársins 1990 þegar forræðismál Sophiu vegna dætra hennar hófst fyrir tyrkneskum dómstólum. Hún barðist fyrir því að fá að umgangast dætur sínar, þær Dagbjörtu og Rúnu. Faðir stúlknanna, Halim Al, stóð í vegi fyrir því.

Sophia var fyrir ári dæmd til að greiða Sigurði Pétri Harðarsyni 20 milljónir vegna vangoldinna lána sem hann veitti henni í tengslum við forræðisdeiluna. Hún var síðan ákærð fyrir að bera Sigurð Pétur röngum sökum, sem leiddi til þess að hann var grunaður um skjalafals árið 2007. 

Um er að ræða skuldabréf upp á tugi milljóna, sem Sophia sagði Sigurð Pétur hafa falsað nafn hennar á. Rannsókn erlends rithandarsérfræðings leiddi hins vegar í ljós, að nær engar líkur væru á að Sigurður Pétur hefðu skrifað nafn Sophiu á bréfin og miklar líkur væru á að Sophia hefði sjálf skrifað undir þau.

Rithandarsérfræðingurinn staðfesti þessa niðurstöðu í réttarhaldinu í morgun. Sophia lýsti því yfir að hún hefði ekki skrifað undir bréfin og Rúna, sem er skráð sem vottur á bréfunum, bar að hún hefði heldur ekki skrifað nafn sitt á þau.