Reykjanesbær mbl.is/ÞÖK

Eftirlitsnefnd með fjármálum sveitarfélaga hefur sent Reykjanesbæ bréf þar sem fram kemur að nefndin muni ekki aðhafast frekar varðandi fjármál sveitarfélagsins.  Reykjanesbær er eitt þeirra sveitarfélaga fékk bréf frá Eftirlitsnefnd sveitarfélaga vegna afkomu ársins 2008.

Árni Sigfússon, bæjarstjóri Reykjanesbæjar, segir að í  bréfinu komi fram að nefndin óski eftir því í bréfinu að fá upplýsingar um ársreikning bæjarfélagsins fyrir árið 2009 strax og þær upplýsingar liggja fyrir til þess að fá vissu fyrir því að hann sé í samræmi við þær áætlanir sem lagðar hafa verið fram. Það er endurskoðaða fjárhagsáætlun.

„Það er mjög eðlilegt og sjálfsagt að verða við því. Þannig af þeirra hálfu er ekki aðhafst frekar," segir Árni.

Hann segist vera ánægður með þessa niðurstöðu enda valdi það alltaf taugatitringi þegar eftirlitsmenn sýna áhyggjur og vilji fá upplýsingar. „Þá er það jafn ánægjulegt þegar komist er að þeirri niðurstöðu að ekki sé ástæða til að aðhafast frekar," segir Árni.

Níu sveitarfélög sem ekki hafa áður verið til skoðunar vegna fjármála sinna fengu í fyrra bréf frá eftirlitsnefnd með fjármálum sveitarfélaga þar sem óskað er eftir frekari upplýsingum um fjárhaginn.

Sveitarfélögin sem fengu bréf frá eftirlitsnefndinni í fyrra voru: Kópavogur, Hafnarfjörður, Álftanes, Reykjanesbær, Sandgerði, Borgarbyggð, Grundarfjarðarbær, Fjarðabyggð og Fljótsdalshérað. Bolungarvík hefur verið undir sérstöku eftirlit og þurfti m.a. að hækka útsvarið upp fyrir hámarkið, með sérstakri heimild, en fjárhagur sveitarfélagsins hefur mjög vænkast með aðhaldsaðgerðum og auknum tekjum.

Í fjárhagsáætlun Reykjanesbæjar fyrir árið 2010 er lagt upp með þá forsendu að framkvæmdir hefjist fljótlega við nýtt álver í Helguvík og að nokkur önnur verkefni skapi störf sem leiði til þess að útsvarstekjur bæjarins hækki um 680 milljónir og að þannig verði afgangur af rekstri bæjarins 42 milljónir.