„Nú sjá menn fram á það, að mögulegt sé að taka upp viðræður á nýjum forsendum og þá vill enginn kannast við að bera ábyrgð á að hafa leitt til lykta viðræðurnar og landað Icesave-samningnum,“ segir Bjarni Benediktsson, formaður Sjálfstæðisflokksins, um grein Indriða H. Þorlákssonar um Icesave sem birtist í Fréttablaðinu í gær og birtingu draga að samningum frá desember 2008.

Bjarni segir með ólíkindum miðað við stöðu Icesave-málsins í dag að aðstoðarmaður fjármálaráðherra dragi á opinberum vettvangi fram það sem hann telur málstað Íslands síst til framdráttar.

Grein Indriða var svar við annarri skrifaðri af Kristrúnu Heimisdóttur, aðstoðarkonu Ingibjargar Sólrúnar Gísladóttur í tíð utanríkisráðherrasetu hennar. Steingrímur J. Sigfússon, fjármálaráðherra, segir að Indriði hafi viljað koma þessum sjónarmiðum á framfæri úr því að umræðan var hafin á annað borð og „dregnar upp, að þeirra dómi sem gjörþekkja bakgrunn Icesave-málsins, rangar ályktanir um stöðu þess í nóvember/desember árið 2008.“ Hann segist ekkert sjá að því að menn komi upplýsingum um þennan tíma á framfæri og geri þessi gögn aðgengileg. Steingrímur á þar við drögin að lánasamningum við Hollendinga og Breta frá því í desember 2008, sem birt voru á vefsvæðinu island.is í gær.

Nákvæmlega engin þýðing

Kristrún sendi raunar frá sér athugasemd síðdegis í gær þar sem kemur fram að þau drög hafi aldrei verið borin undir utanríkisráðherra, og ýmis skjöl af sama tagi „enda reyndu Bretar og Hollendingar margsinnis að knýja Íslendinga til að ganga að tvíhliða lánasamningum sem Íslendingar töldu óaðgengilega“. Kristrún segir skjölin því engum tíðindum sæta enda á þessum tíma langt í land að samningar lægju fyrir; enda lágmarksviðmið Íslands að ná pólitískum árangri á grundvelli ályktunar Alþingis um Brusselviðmiðin.

Bjarni bætir því við, að drögin hafi „nákvæmlega enga þýðingu, aðra en að þar er birtingarmynd þeirra krafna sem Bretar og Hollendingar hafa haldið á lofti frá upphafi“. Hann segir það sem máli skiptir vera, að í fyrri tíð var ekki samið um neitt. „Og það þýðir ekkert fyrir þetta fólk að reyna að þvo hendur sínar af eigin verkum. Þetta er makalaust innlegg í umræðuna á þessum tímapunkti.“

Bókanir gagna mismunandi

Ítrekað hefur verið kallað eftir því að öll gögn sem varða Icesave verði gerð opinber og oft karpað um það á Alþingi. Steingrímur segir umrædd skjöl á ábyrgð fyrri ríkisstjórnar og hún verði að svara því til hvers vegna þau voru ekki kynnt í utanríkismálanefnd eða fyrir þingmönnum. „Hins vegar er það þannig, að hluti gagna virðist ekki hafa verið bókaður með sama hætti og hvert einasta snifsi síðan við tókum við forræði málsins. Af þeim ástæðum var þetta ekki aðgengilegt hér með sama hætti og önnur gögn frá byrjun.“ Hann tekur fram að hugsanlega leynist fleiri gögn um forsögu Icesave-málsins, t.a.m. í utanríkisráðuneytinu.

Steingrímur segir hins vegar að birting gagnanna breyti engu varðandi stöðu málsins í dag, breyti ekki þörfinni á að leysa málið og „ég treysti því og trúi að það fari enginn að láta þetta hafa áhrif á stöðu málsins“.

Spurður hvort grein Indriða hafi verið birt með samþykki ráðherrans neitar Steingrímur því. „Indriði stendur fyrir sínum skrifum og hefur fullt leyfi til þess að svara fyrir sig þegar hann telur tilefni til. Ég geri engar athugasemdir við það og geri enga kröfu um það, að hann beri undir mig greinar í sínu nafni.“

6,7% vextir og afborganir til 2018

Fjármálaráðuneytið birti í gær lánasamningadrög vegna Icesave milli þáverandi samninganefnda Íslands, Bretlands og Hollands dagsett 18. og 19. desember 2008, í tíð ríkisstjórnar Sjálfstæðisflokks og Samfylkingar. Þar er greiðsluskylda á lágmarkstryggingu innistæðna tryggingasjóðsins viðurkennd og kveðið á um fasta vexti, 6,7%, í samningsdrögunum við Hollendinga en ákveðið vaxtaviðmið við skuldabréfavexti (UK gilt rate) í samningsdrögunum við Breta. Skv. upplýsingum fjármálaráðuneytisins eru þetta drög sem send voru til íslenskra stjórnvalda eftir að athugasemdir höfðu verið gerðar af hálfu íslensku samninganefndarinnar. Gert var ráð fyrir 10 ára lánstíma, að afborganir af höfuðstól hæfust 2012 og þeim lyki 2018 en byrjað yrði strax að greiða vexti, tvisvar á ári, í apríl og október. Indriði H. Þorláksson, aðstoðarmaður fjármálaráðherra, segir að þetta séu síðustu drögin sem fyrir liggi frá þessum tíma eftir að athugasemdir höfðu verið gerðar. Honum virðist hins vegar að í janúar 2009 hafi komið til ennþá nýrri útgáfa af samningsdrögunum. 6,7%

Íslendingar undirrituðu viljayfirlýsingu ásamt Hollendingum um lán á 6,7% vöxtum eftir að samninganefnd þeirra hafði skírskotað til útreikninga AGS.

5,55%

Í Icesave-samningunum sem samþykktir voru í júní voru vextirnir 5,55%. Prósentan var lækkuð með tilliti til fordæmalausra aðstæðna á Íslandi.

?%

Ef Bretar og Hollendingar fallast á að taka upp viðræður að nýju er óvíst hver prósentan verður.