Hjálparstarfsmenn til Haiti
Erla Svava Sigurðardóttr, Kristjón Þorkelsson, Áslaug Arnoldsdóttir og Maríanna Csillag eru á förum til Haiti til hjálparstarfa. Rauði krossinn
Sex íslenskir hjálparstarfsmenn eru á förum til Haíti nú um helgina að
beiðni Alþjóða Rauða krossins. Mánuður er liðinn frá því jarðskjálftinn
mikli reið þar yfir, og hefur Alþjóða Rauði krossinn hækkað neyðarbeiðni sína úr 12 milljörðum íslenskra króna í 25 milljarða.
Fjórir hjúkrunarfræðingar, þær Áslaug Arnoldsdóttir, Maríanna Csillag, Erla Svava Sigurðardóttir og Lilja Óskarsdóttir munu starfa við tjaldsjúkrahús þýska og finnska Rauða krossins í fátækrahverfinu Carrefour í Port-au-Prince.
Kristjón Þorkelsson verður ábyrgur fyrir skipulagningu vatnshreinsimála meðan á neyðaraðgerðum stendur. Sólveig Björk
Sveinbjörnsdóttir gengur til liðs við alþjóðlegt sérfræðiteymi sem nú
vinnur að skipulagningu uppbyggingarstarfs Rauða kross hreyfingarinnar á Haítí.
Í tilkynningu frá Rauða krossinum segir m.a. að þær Áslaug og Maríanna séu á meðal reyndustu sendifulltrúa Rauða kross Íslands. Þær hafa starfað við fjölda neyðaraðgerða fyrir Rauða kross hreyfinguna í Afríku, Evrópu, Asíu og Miðausturlöndum.
Lilja, sem er hjúkrunarfræðingur og guðfræðingur, hefur unnið fyrir Rauða krossinn og önnur hjálparsamtök í Súdan, Bosníu og Eþíópíu. Erla Svava fer nú í fyrsta sinn sem sendifulltrúi Rauða kross Íslands.
Sólveig Björk er félagsfræðingur og hefur unnið með íslensku
friðargæslunni, Sameinuðu þjóðunum og öðrum hjálparsamtökum í Sri Lanka, Sýrlandi og Súdan. Þetta er einnig í fyrsta skipti sem hún fer sem sendifulltrúi Rauða kross Íslands.
Kristjón hefur starfað sem sendifulltrúi Rauða krossins frá árinu 1991, og hefur víðtæka reynslu af vatns- og hreinlætisverkefnum í Miðausturlöndum og Afríku, auk þess sem hann starfaði fyrir íslensku friðargæsluna í Kosovo.
Rauði kross Íslands hefur þar með sent 12 hjálparstarfsmenn til starfa á Haítí, en fyrir eru Lilja Steingrímsdóttir hjúkrunarfræðingur sem einnig starfar á tjaldsjúkrahúsinu í Carrefour, Sigríður Þormar, Hrafnhildur Sverrisdóttir og David Lynch, sem starfa með alþjóðlegu sérfræðingateymi um skipulagningu uppbyggingarstarfsins, Friðbjörn Sigurðsson læknir í sem vinnur með heilsugæslusveit þýska Rauða krossins, og Hlín Baldvinsdóttir sem hefur starfað við fjármálastjórn neyðaraðgerðanna.
Hlín heldur aftur til Íslands á sunnudag, en þá hefur hún verið mánuð á vettvangi.
