mbl.is/Skapti

Icelandair segir, að Flugvirkjafélag Íslands hafi boðað verkfall dagana 22. til 28. febrúar en samningaviður milli Icelandair og flugvirkja standa nú yfir hjá ríkissáttasemjara og segir Icelandair að flugvirkjar krefjist 25% launahækkunar. 

Í tilkynningu segist Icelandair harma þá ákvörðun Flugvirkjafélags Íslands að boða til verkfalls vegna þess tjóns sem það geti valdið viðskiptavinum, íslenskri ferðaþjónustu og atvinnulífi. Icelandair hafi á undanförnum vikum samið við aðra starfshópa án truflana á flugi og vonast sé til þess svo verði einnig nú. Segir félagið að verði af verkfallinu hafi það áhrif á ferðir um 20 þúsund einstaklinga.

„Í samningaviðræðum að undanförnu greinir aðila fyrst og fremst á um eitt atriði, þ.e. kröfu Flugvirkjafélagsins um 25% launahækkun. Að mati Icelandair er slík krafa úr takti við það sem samið hefur verið um á almennum vinnumarkaði. Icelandair hefur boðið Flugvirkjafélaginu sambærilegar kjarabætur og samið var um við aðra starfshópa á undanförnum vikum og getur ekki gengið að ítrustu kröfum flugvirkja um langtum meiri launahækkun en samstarfsmenn þeirra hafa samið um. Það eru Icelandair mikil vonbrigði að forsvarsmenn flugvirkja hafi ekki sýnt þessu skilning.  Atvinnuástand meðal flugvirkja er mjög gott um þessar mundir, mikil vinna í boði og engar uppsagnir á undanförnum misserum, líkt og hjá svo mörgum öðrum stéttum í landinu," segir í tilkynningu Icelandair.