Alþjóðahafrannsóknaráðið telur að stefna Hafrannsóknastofnunarinnar muni leiða til vaxtar þorskstofnsins. Rax / Ragnar Axelsson

Alþjóðahafrannsóknaráðið (ICES) telur yfirgnæfandi líkur fyrir því að  nýtingarstefna sú sem Hafrannsóknastofnunin kynnti vorið 2009 muni leiða til þess að hrygningarstofnar þorsks fari vaxandi og verði stærri árið 2015 en þeir voru í ársbyrjun 2009.

Jón Bjarnason, sjávarútvegs- og landbúnaðarráðherra, hefur fengið svar frá ICES, en Hafrannsóknastofnunin á aðild að því. Þar er gerð grein fyrir úttekt sérfræðinganefndar sem kölluð var sérstaklega til að taka út nýtingarstefnuna sem Hafrannsóknastofnunin lagði til vorið 2009 að fylgt verði næstu fimm ár.

Auk þess að hrygningarstofnar þorsks muni vaxa telur ICES að  nýtingarstefnan sé í samræmi við alþjóðleg varúðarsjónarmið og viðmið um afrakstur fiskistofna sem leiði til betri afkomu til lengri tíma litið. Sjávarútvegs- og landbúnaðarráðuneytið telur sterkar líkur á að álit Alþjóðahafrannsóknaráðsins muni hafa markaðslegt gildi fyrir seljendur íslenskra þorskafurða.

„Ákvarðanir um mótun aflareglu fyrir fleiri fiskitegundir liggja ekki enn fyrir að hálfu ráðuneytisins.  Lögð er áhersla á að aukin reynsla þurfi að komast á nýtingarstefnu þorsksins og samspil ólíkra tegunda í vistkerfinu.

Það er mat sjávarútvegs- og landbúnaðarráðherra, Jóns Bjarnasonar, að hin svokallaða fjölstofnaumræða þurfi að þroskast frekar. Jafnframt gefa hinar áðurnefndu öru breytingar í lífríkinu, ásamt viðbótarþekkingu sem aflað er á hverjum tíma, full rök til þess að undirbyggja vel hvert skref í þessum efnum.

Stefna sjávarútvegs- og landbúnaðarráðherra, Jóns Bjarnasonar, miðast við að unnt verði að auka aflaheimildir með sjálfbærum hætti og á fjölþættum vistfræðilegum grunni á komandi árum,“ samkvæmt frétt ráðuneytisins.

Frétt sjávarútvegs- og landbúnaðarráðuneytisins