mbl.is/Ómar Óskarsson

Heilbrigðisyfirvöld hérlendis hyggjast nú hefja bólusetningarátak gegn svínaflensunni. Landsmenn hafa á sl. vikum og mánuðum eindregið verið hvattir til þess að láta bólusetja sig gegn svínaflensunni og verjast á þann hátt nýju áhlaupi veikinnar sem búast má við síðar á þessu ári eða því næsta.

Fram kemur í fréttatilkynningu frá sóttvarnalækni að bólusetning sem fyrst sé besta vörnin gegn flensunni. Einnig kemur fram að nóg sé til af bóluefni í landinu.

Ekki þarf lengur að panta tíma í bólusetningu vegna svínaflensunnar á heilsugæslustöðvum höfuðborgarsvæðisins heldur er fólk velkomið þangað alla virka daga á almennum þjónustutíma án þess að gera boð á undan sér. Hins vegar þarf áfram að panta tíma fyrir bólusetningu á heilsugæslustöðvum utan höfuðborgarsvæðisins.

Í tilkynningu sóttvarnalæknis kemur fram að stór hluti þjóðarinnar sé enn í smithætti. Aðeins 40% þjóðarinnar hefur enn sem komið er látið bólusetja sig, en það er eitt hæsta hlutfall sem þekkist í heiminum.

„Fullvíst er að bólusetningarnar og aðrar ráðstafanir til að verjast smiti (tíðir handþvottar, spritt á hendur, notkun pappírsklúta og fleira) hafa komið í veg fyrir að tugir þúsunda Íslendinga sýktust af svínainflúensunni fyrr í vetur.

Betur má ef duga skal. Gera má ráð fyrir nýjum faraldri svínainflúensu hérlendis nema mun fleiri láti bólusetja sig.Með bólusetningarátaki á næstu dögum og vikum er stefnt að því að koma í veg fyrir nýjan faraldur svínainflúensufaraldur hér á landi.“