Flestir andvígir spilavítum

63,7% Íslendinga eru frekar eða mjög andvíg því að rekstur spilavíta verði leyfður á Íslandi en 71% karla undir þrítugu eru því fylgjandi ef marka má nýja könnun MMR.

MMR kannaði hversu fylgjandi eða andvígt fólk væri gagnvart því að leyfa rekstur spilavíta á Íslandi. Af þeim sem tóku afstöðu voru 63,7% sem sögðust frekar eða mjög andvíg hugmyndinni. Skipt eftir einstökum svörum voru 39,5% sem sögðust mjög andvíg, 24,2% sögðust frekar andvíg, 20,6% sögðust frekar fylgjandi og 15,7% sögðust mjög fylgjandi því að rekstur spilavíta væri leyfður á Íslandi, samkvæmt fréttatilkynningu frá MMR.

Töluverður munur reyndist á afstöðu svarenda eftir kyni og aldri. Þannig voru 46% karla sem sögðust hlynnt því að rekstur spilavíta væri leyfður en eingöngu 26% kvenna. Þá voru 55% svarenda undir þrítugu fylgjandi því að rekstur spilavíta væri leyfður á meðan þetta sama hlutfall var 35% hjá aldurshópnum 30-49 ára og eingöngu 21% meðal 50 ára og eldri. Sé fjöldi karla undir þrítugu skoðaður sérstaklega kemur í ljós að 71% svarenda í þessu hópi sögðust fylgjandi því að rekstur spilavíta yrði leyfður á Íslandi.

Fréttatilkynningin í heild

• 1 blogg um fréttina

Bloggað um fréttina

• Kristin stjórnmálasamtök: Yfirgnæfandi andstaða við opnun spilavíta á Íslandi