Slitasstjórn SPRON segir að aukakostnaður hefði fylgt því að útvega gögnin strax. Árni Sæberg

Slitastjórn SPRON segir í yfirlýsingu að gefnu tilefni, að lögmanni stofnfjáreigenda hafi verið boðið að nálgast gögn sem hann bað um, fyrr en slitastjórnin gat afhent þau, gegn því að hann greiddi tölvufyrirtæki kostnað sem því fylgdi. 

Í athugasemd frá slitastjórninni segir að í Ríkissjónvarpinu og fleiri miðlum hafi í gær verið haft eftir Grími Sigurðssyni, lögmanni stofnfjáreiganda í SPRON, að illa gangi að fá gögn frá slitastjórn SPRON tengd viðskiptum með stofnfjárbréf, sérstaklega upptökur af símtölum.  Megi skilja á málflutningi Gríms að sú ástæða sem slitastjórn SPRON beri fyrir sig þ.e. að borga þurfi tölvufyrirtæki fyrir gögnin, sé ótrúverðug.

Af þessu tilefni vill slitastjórn SPRON taka fram:

„Öll skjalleg gögn sem beðið hefur verið um vegna málsins voru afhent fljótt og vel eftir að skorið hafði verið úr um heimild til þess.
Öll tölvukerfi þau sem SPRON notaði voru vistuð og keyrð af utanaðkomandi tölvufyrirtæki.  Skilanefnd SPRON og síðar slitastjórn SPRON hefur unnið ötullega að því að taka þessi kerfi yfir og sjá um rekstur þeirra sjálf.  Markmið þess er að draga úr kostnaði til hagræðis fyrir kröfuhafa og aðra þá sem kunna að eiga rétt á þessum gögnum.

Þessi vinna er tímafrek og stendur enn yfir og er Grími Sigurðssyni lögmanni kunnugt um stöðu mála og að slitastjórn SPRON hafi unnið af fullum heilindum og vilja við það verk.  Þess má geta að lögmanninum hefur verið boðið að nálgast gögnin fyrr gegn því að greiða umræddu tölvufyrirtæki þann kostnað sem af slíku hlytist.
Slitastjórn SPRON vonast til þess að verkefni þessu ljúki á næstu vikum. 

Slitastjórn SPRON harmar að lögmaðurinn sem þekkir til staðreynda málsins og hefur verið upplýstur um gang mála skuli sæta færis að gera slitastjórn SPRON tortryggilega í fjölmiðlum vegna þessa máls.
Þess má geta að ekki var haft samband af fjölmiðlum við slitastjórn SPRON vegna málsins.“