Nýja varðskipið Þór var sjósett fyrir nokkru í Síle. mbl.is

Tveir Íslendingar og fimm Danir eru á vegum Landhelgisgæslunnar í borginni Concepcion, ekki langt frá þar sem skjálftinn stóri reið yfir í Síle. Tveir Íslendingar eru þar einnig á vegum Ísfélags Vestmannaeyja. Einn Íslendingur er í Valdivia á vegum Fram Foods hf.

Fréttin síðast uppfærð kl. 12.55

Stjórnvöld í Síle hafa greint frá því að 64 hafi látist vegna jarðskjálftanna í nótt og morgun. Gefnar hafa verið út flóðbylgjuviðvaranir víða við Kyrrahaf, m.a. í Nýja Sjálandi vegna austurstranda norður- og suðureyjanna og Chatham eyja. 

Áströlsk og japönsk stjórnvöld hafa einnig varað við flóðbylgjuhættu. Í morgun var gefin út flóðbylgjuviðvörun vegna Mið- og Suður-Ameríku, Suðurskautslandsins og eyja í Frönsku Pólynesíu. 

Óskar eftir upplýsingum um Íslendinga

Utanríkisráðuneytið óskar eftir að frétta af Íslendingum sem staddir eru á jarðskjálftasvæðinu. Pétur Ásgeirsson skrifstofustjóri óskaði eftir því að fólk með upplýsingar um Íslendinga þar hringi í síma ráðuneytisins, 545 9900, en þar er hægt að tengjast neyðarvakt ráðuneytisins.

Einn Íslendingur er í borginni Valdivia, um 700 km sunnan við Concepcíón, á vesturströnd Síle. Hann er starfsmaður Fram Foods hf. sem er með starfsemi á svæðinu. Halldór Þórarinsson, stjórnarformaður Fram Foods, sagði að reynt hafi verið að ná sambandi við manninn í morgun en það ekki tekist. 

Að sögn Georgs Lárussonar, forstjóra LHG, hefur ekki náðst í starfsmenn gæslunnar enn enda liggur símasamband að mestu niðri við landið. Stefán B. Friðriksson, forstjóri Ísfélags Vestmannaeyja hf., sagði einnig að ekki hafi náðst í þeirra fólk á svæðinu.

Nýja varðskipið Þór og tvö ný fjölveiðiskip Ísfélags Vestmannaeyja eru í smíðum í ASMAR skipasmíðastöð sjóhersins í Talcahuano í Síle, sem er nálægt upptökum stóru jarðskjálftanna í nótt. Varðskipið er í slipp og skip Ísfélagsins enn í smíðum á landi.

Stefán hjá Ísfélaginu sagði að í Síle séu hjón á þeirra vegum, maðurinn hefur eftirlit með smíði tveggja skipa félagsins. Þau búa rétt hjá skipasmíðastöðinni í Talcahuano. Stefnt var að því að sjósetja annað skip Ísfélagsins í vor en hitt er miklu styttra á veg komið.

Óttast er að ef hafnarbylgja skellur á landinu geti mikið tjón orðið. 

Eggert B. Guðmundsson, forstjóri HBGranda og ræðismaður Síle, kvaðst hafa reynt að ná sambandi við sendiráðið í Osló í morgun en það ekki tekist.

Eggert sagði að HBGrandi eigi hlut í Friosur sem er með starfsemi á vesturströnd Síle. Hluti af útgerð Friosur er í grennd við borgina Concepción. Tveir Íslendingar vinna hjá Friosur en þeir eru með bækistöðvar annars staðar. 

Um 50 Sílebúar eru búsettir hér á landi.

Utanríkisráðuneytið hefur reynt að ná sambandi við ræðismann Íslands í Síle en ekki tekist. Sendiráði Íslands í Washington verður falið að hafa samband við sendiráð Síle þar í borg til að afla upplýsinga. 

Bílar krömdust undir byggingu í Santiago sem hrundi í jarðskjálftanum. Reuters

Kortið sýnir hvernig mögulegar flóðbylgjur geta breiðst út um Kyrrahafið frá upptökum jarðskjálftans í Chile. Reuters