Magnús Halldórsson og Ragnar Axelsson, ásamt  Ágústi Inga Jónssyni, Morgunblaðinu, eru tilnefndir til blaðamannaverðlauna Blaðamannafélags Íslands í flokkinum yfir bestu umfjallanir ársins 2009 fyrir skilmerkilega, myndræna og upplýsandi umfjöllun sem varpaði ljósi á erfitt ástand  á fasteignamarkaði  á Íslandi. Jafnframt er teiknarinn Halldór tilnefndur fyrir teikningar sínar í Morgunblaðinu.

Tilnefningar til Blaðamannaverðlauna Blaðamannafélags Íslands fyrir árið 2009 voru kynntar í kvöld en árleg ljósmyndasýning Blaðaljósmyndarafélags Íslands með myndum ársins 2009 verður haldin 6. mars í Gerðarsafni í Kópavogi kl. 15.  Við sama tækifæri verða afhent verðlaun vegna Blaðamannaverðlauna ársins, Rannsóknarblaðamennsku ársins og Umfjöllunar ársins.

 Rannsóknarlaðamennska ársins 2009:

Guðný Helga Herbertsdóttir, Stöð 2, fyrir fjölmargar áhugaverðar fréttir um skattalega meðferð mála í tengslum við fjármálakreppuna og fyrir fjölbreyttar og upplýsandi fréttir um hrunið hér heima og erlendis.

Ingi F. Vilhjálmsson, DV, fyrir skrif um kúlulán og fjölmargar afhjúpandi fréttir um viðskiptahætti auðmanna og stórfyrirtækja í aðdraganda og eftirmála hrunsins.

Þórður Snær Júlíusson, Viðskiptablaðinu, áður Morgunblaðinu, fyrir upplýsandi fréttir og greinaflokka um aflandsfélög og skattaskjól, einkavæðingu bankanna og umsvifamikil viðskipti stórfyrirtækja.

 Besta umfjöllun ársins 2009:

Magnús Halldórsson og Ragnar Axelsson, ásamt Ágústi Inga Jónssyni, Morgunblaðinu, fyrir skilmerkilega, myndræna og upplýsandi umfjöllun sem varpaði ljósi á erfitt ástand  á fasteignamarkaði  á Íslandi.

 Lóa Pind Aldísardóttir, Stöð 2, fyrir vandaðar og aðgengilegar fréttaskýringar um flókin mál, sem varða almenning miklu svo sem um fjármál heimilanna og aðild Íslands að ESB.

Svavar Hávarðsson, Fréttablaðinu, fyrir skilmerkilegan og ítarlegan fréttaskýringarflokk um endurskoðun stjórnarskrárinnar.

 Blaðamannaverðlaun ársins 2009:

Gunnar Karlsson, Fréttablaðinu fyrir „Spottið“ og Halldór Baldursson, Morgunblaðinu, fyrir „Halldór“, áhrifamiklar teikningar þar sem brennandi samfélagsmál eru sett í hárbeitt en um leið skoplegt ljós.

Jóhann Hauksson, DV, fyrir leiðandi umfjöllun um fall og myndun ríkisstjórna og fréttaskýringar um mikilvæg þjóðfélagsmál.

Þóra Arnórsdóttir, Kastljósi RÚV, fyrir mjög vel undirbúin og útfærð viðtöl við innlenda og erlenda sérfræðinga um ýmis málefni sem hátt bar í þjóðfélagsumræðunni.