Íbúar virða fyrir sér skemmdir og rusl viðð ströndina nálægt upptökum jarðskjálftanna. Reuters

Ekki hefur enn heyrst frá sjö Íslendingum, sem staddir eru á jarðskjálftasvæðinu frá Santiago til Concepción í Chile. Um er að ræða fjögurra manna fjölskyldu og þrjá einstaklinga. Ekki er talin sérstök ástæða til að óttast um afdrif fólksins, að sögn utanríkisráðuneytisins.

Pétur Ásgeirsson, skrifstofustjóri í utanríkisráðuneytinu, sagði að ráðuneytið hafi verið látið vita af fjörutiu Íslendingum sem voru á jarðskjálftasvæðinu. Staðfest hefur verið að ekkert ami að 33 þeirra.

Fimm þeirra sem ekki hefur enn náðst í dvelja á þessum slóðum og tveir eru ferðamenn. Af þeim sem dvelja þarna og ekki hefur heyrst í er fjögurra manna fjölskylda og einstaklingur. 

„Við höfum þannig upplýsingar um þetta fólk að við teljum ekki ástæðu til að hafa áhyggjur af því,“ sagði Pétur. Fjarskiptasamband við jarðskjálftasvæðið hefur aukist jafnt og þétt að sögn Péturs. Reynt verður áfram að heyra í fólkinu. „Við viljum heyra frá öllu þessu fólki og fá staðfest að það sé í lagi með það.“

Pétur sagði að stundum hafi náðst tölvupóstsamband og svo virðist sem Blackberry farsímar virki að einhverju leyti. 

Ekki hefur náðst samband við ræðismann Íslands í Santiago enn sem komið er. Pétur sagði að haft hafi verið samband við norrænu utanríkisþjónusturnar í Santiago. Sænska sendiráðið er óstarfhæft og starfsmenn þess eru fluttir til Dananna.

Einhver fleiri norræn sendiráð eru í vandræðum með húsnæði sitt í Santiago. Einhverjir eru farnir að reka starfsemi úr sendiherrabústöðum í stað skrifstofa sinna.