Drekasvæðið. mbl.is/KG

Iðnaðarráðherra hefur ákveðið að 2. útboð sérleyfa til rannsókna og vinnslu kolvetnis á Drekasvæðinu muni fara fram árið 2011 á tímabilinu 1. ágúst til 1. desember.

Fram kemur í tilkynningu frá iðnaðarráðuneytinu að Orkustofnun hafi verið í sambandi við olíufélög, sem sýndu fyrsta útboði til olíuleitar á Drekasvæðinu áhuga en sóttu ekki um.  Einnig hafi verið rætt við forsvarsmenn þeirra fyrirtækja sem sóttu um rannsóknar- og vinnsluleyfi en drógu umsóknir sínar til baka. Í samskiptum við þessi fyrirtæki hafi ýmsar ábendingar komið fram sem gagnlegar séu í undirbúningi fyrir framhald leyfisveitinga til olíuleitar á Íslandi.

Undirbúningur að sýnatöku botnsets á Drekasvæðinu  stendur nú yfir á vegum stjórnvalda. Stefnt er að því að setkjarnar af yfirborði hafsbotnsins verði teknir á völdum stöðum á svæðinu í sumar. Ráðuneytið segir, að greiningar á olíu- og gasinnihaldi þeirra geti varpað skýrara ljósi á  móðurberg og myndunarskilyrði olíu á svæðinu sem dragi úr óvissu og  auðveldar ákvarðanatöku hjá væntanlegum þátttakendum í útboðinu.

Sérleyfi til rannsóknar og vinnslu kolvetnis á Drekasvæðinu voru boðin út á fyrri hluta síðasta árs og bárust þá tvær umsóknir, frá norsku félögunum Aker Exploration og Sagex Petroleum. Bæði fyrirtækin drógu hins vegar umsóknirnar til baka og kvörtuðu m.a. yfir háum sköttum.