Sjallinn. mbl.is/Skapti

Slökkviliðsstjórinn á Akureyri og byggingafulltrúi Akureyrar segja að Sjallinn sé enn lokaður og að staðurinn verði lokaður þar til að öllum öryggiskröfum til veitingarekstursins verður fullnægt. Greint var frá því á mbl.is á laugardag að staðurinn hafi verið opnaður á ný, samkvæmt upplýsingum frá skemmtanastjóra Sjallans.

„Í ljósi fréttar Mbl. þ. 27.2 s.l. um að búið sé að opna Sjallann á Akureyri á ný vilja slökkviliðstjórinn og byggingarfulltrúinn á Akureyri árétta að Sjallinn á Akureyri er lokaður og verður lokaður þar til að öllum öryggiskröfum til veitingarekstursins verður fullnægt. Um tímabundna opnun var að ræða í hluta hússins s.l. laugardagskvöld.

Iðnaðarmenn eru við störf í húsinu við úrbætur sem ekki er lokið. Embætti byggingafulltrúa hafa ekki borist endurskoðaðar aðalteikningar af veitingastaðnum en gert er ráð fyrir að þeim verði skilað inn fyrir afgreiðslufund á miðvikudag. Í framhaldinu verður gerð úttekt á staðnum á ný og ef í ljós kemur að staðurinn uppfyllir kröfur byggingarreglugerðar þ.m.t. öryggismálum getur veitingareksturinn hafist á ný," segir í tilkynningu frá slökkviliðsstjóra og byggingarfulltrúa Akureyrar.