Þór við bryggju í ASMAR- skipasmíðastöð sjóhersins í Chile.

Hins vegar reynum við að koma þeim eins fljótt og auðið er aftur til síns heima,“ sagði Georg Lárusson, forstjóri Landhelgisgæslunnar, um líðan sex starfsmanna Gæslunnar í hafnarborginni Concepcion í Chile.

„Íslendingarnir á okkar vegum heita Ragnar Ingólfsson og Unnþór Torfason. Við fengum þær fréttir í nótt [aðfaranótt sunnudags] að Ragnar hefði verið á hóteli sem er ónýtt en Unnþór í einni af íbúðunum sem eru í okkar leigu í borginni. Mér skilst að hótelið hafi ekki hrunið en ekki sé óhætt að dvelja í því.

Danirnir eru á öðrum stöðum í borginni. Einn þeirra komst í tölvupóstsamband við konu sína á Jótlandi og gat komið þeim skilaboðum til hennar að þeir gætu ekki dvalið í sínum íbúðum, þeir hefðust við í bílum,“ sagði Georg.

Sexmenningarnir dvelja í borginni í tengslum við framkvæmdir við varðskipið Þór sem var að sögn Georgs búið að vera í þurrkví í nokkra daga eftir prufusiglingu. Skipasmíðastöðin er ónýt og vatn komst inn í vélarrúm Þórs og dælurými.

Á tíunda tímanum í gærkvöldi var staðan þessi: „Danirnir náðu að komast í skipasmíðastöðina rétt í þessu og hittu þar yfirmenn stöðvarinnar. Þeir segja að stöðin sé ónýt og að þar verði ekkert gert næstu 6 til 12 mánuðina. Skipið er í kvínni og hallast nokkuð. Það kom flóðbylgja sem lyfti skipinu mjög hátt af búkkunum sem það stóð á. Svo flæddi út aftur og skipið liggur að hluta til á hliðinni.

Það hefur komist vatn inn í vélarrúm og dælurými sem er mjög alvarlegt mál. Þannig að núna hlýtur það að vera til alvarlegrar skoðunar hvort ekki er nauðsynlegt að draga skipið eitthvað annað til að ljúka verkinu,“ sagði Georg og bætti við að Gæslan væri tilbúin að senda menn á staðinn þegar aðstæður leyfðu, enda vildi hún tryggja varðskipið og þá miklu hagsmuni sem þar væru í húfi. „Þeir eru í startholunum,“ sagði Georg en nýr kostar Þór um fimm milljarða króna.