Katrín Júlíusdóttir á iðnþingi í dag.

Unnið er í iðnaðarráðuneytinu að stofnun Framkvæmdasjóðs ferðaþjónustunnar sem á að stuðla að uppbyggingu mannvirkja á ferðamannastöðum. Þetta kom fram í ræðu Katrínar Júlíusdóttur, iðnaðarráðherra, á iðnþingi í dag.

Katrín sagði, að reiknað sé með að sjóðurinn verði fjármagnaður til framtíðar af ferðamálagjaldi. Í þeim tilgangi að sjóðurinn geti sem fyrst haft jákvæð áhrif á atvinnuþróunina sé gert ráð fyrir að lífeyrissjóðir geti lagt honum til fé í upphafi sem síðan endurgreiðist af tekjustofni hans. Vonandi geti 500–700 milljónir króna orðið til ráðstöfunar úr þessum sjóði síðar á árinu.

„Við gerum ráð fyrir að ferðamönnum fjölgi úr 500 þúsund á ári í 1 milljón á næstu tíu árum. Það er því ekki vanþörf á að byggja upp. Ég tilgreini þetta hér vegna þess að í slíkri uppbyggingu eru fólgin mörg tækifæri fyrir hönnuði, arkitekta, verkfræðinga og byggingarmenn. Við þurfum að byggja upp á fjölsóttum ferðamannastöðum, hanna nýja staði sem draga að sér ferðafólk og lengja ferðamannatímann með nýjum tilboðum eins og t.d. heilsu- og menningartengdri ferðaþjónustu sem verið er að þróa af miklum krafti um þessar mundir. Í Finnlandi tókst mönnum í þeirri kreppu sem Finnar gengu í gegnum fyrir 20 árum að byggja upp vetrarferðamennsku sem nú slær út sumarvertíðina þar í landi. Þetta getum við gert líka," sagði Katrín. 

Ræða Katrínar í heild