Jón Bjarki Magnússon er einn af aðstandendum Rósturs. Golli / Kjartan Þorbjörnsson

Fyrsta tölublað prentmiðilsins Rósturs lítur dagsins ljós í dag. Í fréttatilkynningu frá ritstjórum fyrsta tölublaðsins kemur fram að Róstur sé nýr óháður prentmiðill sem verði dreift um land allt en dreifing blaðsins verði sýnileg á höfuðborgarsvæðinu næstu daga. Um útgáfu blaðsins sér Áhugamannafélag um breytta tíma.

Í fyrsta leiðara Rósturs segir m.a. að tilgangur Rósta sé að vera mótvægi við þá fjölmiðla sem bundnir séu á klafa fjármagnseigenda. Ekki sé ætlunin að blaðið verði rekið með hagnaði og því mun allur afgangur af rekstri þess renna til  góðgerðarstarfs. Róstur verða ekki reknar með auglýsingatekjum, heldur með frjálsum framlögum lesenda. Til þess að þetta gangi upp verði öllum kostnaði haldið í lágmarki og öll vinna ólaunuð.

„Þrátt fyrir efnahagshrun og ákall um samfélagsbreytingu hefur lítið breyst í raun. Svo virðist sem ríkjandi hugmyndafræði snúist nú um það að lágmarka tapið og stefna aftur í sömu átt og áður, en fara kannski aðeins hægar i þetta skiptið. Ef við viljum raunverulegar breytingar hlýtur það að fela í sér algjöra endurskoðun þeirrar hugmyndafræði sem við samþykkjum og viljum lifa eftir. Með áherslu á 
samvinnu og afneitun gróðahugsjónar vonast Róstur til þess að verða liður í að stuðla að slíkum breytingum,“ skrifa leiðarahöfundar, en í ritstjórn fyrsta tölublaðs sitja þau Anna Þórsdóttir, Helga Katrín Tryggvadóttir og Jón Bjarki Magnússon.