Fjöldi skjálfta yfir 2 á Richter

Almannavarnir eru í viðbragðsstöðu vegna hugsanlegs eldgoss í Eyjafjallajökli. Aukin jarðskjálftavirkni hefur verið í jöklinum frá því um áramót og hafa þúsundir skjálfta mælst á seinustu sólarhringum. 

Á vef Veðurstofunnar má sjá að það sem af er degi hafa mælst 23 skjálftar sem eru stærri en 2 á Richter. Öflugustu skjálftarnir hafa mælst 2,9 og 2,8 á Richter. Þeir mældust á 8-10 km dýpi, en grynnstu skjálftarnir hafa verið á 1-3 km dýpi.   

Síðasta gos í Eyjafjallajökli var 1821-1823 og þar á undan árið 1612. Um landnám Íslands er einnig talið að gosið hafi í jöklinum. Gos í Eyjafjallajökli hafa almennt ekki verið hamfaragos, þau byrja rólega en færast svo í aukana. Árin 1994 og 1999 var mikil jarðskjálftavirkni í Eyjafjallajökli og talið að kvikuinnskot hafi verið djúpt í fjallinu, sem ekki náði að komast upp á yfirborðið.

Vísindamannaráð almannavarna kemur reglulega saman og fer yfir þróun ýmissa mála. Ráðið samanstendur af vísindamönnum og viðbragðsaðilum sem málið varða hverju sinni. Síðasti fundur á þessum vettvangi var 2. febrúar en þá var farið yfir þróunina í Eyjafjallajökli og ákveðið að fylgjast sérstaklega með breytingum á svæðinu. Síðan þá hafa mælingar sýnt landris og þenslu á svæðinu.
mbl.is

Bloggað um fréttina

Fleira áhugavert
Fleira áhugavert