Ragna Árnadóttir fyrir miðju ásamt Guðrúnu Agnarsdóttur (t.v.) og Þórdísi Elvu Þorvaldsdóttur (t.h.) á ráðstefnu Stígamóta í dag. mbl.is/Kristinn Ingvarsson

„ Við verðum að berjast gegn kynbundu ofbeldi,“ sagði Ragna Árnadóttir, dómsmálaráðherra á ráðstefnu í tilefni 20 ára afmælis Stígamóta sem bar yfirskriftina nauðgarnir og viðbrögð samfélagsins við þeim. 

Sagði hún það skyldu ríkisvaldsins að láta það málefni til sín taka hversu fá nauðgunarmál rata til dómstóla, hvort sem það sé löggjafinn, framkvæmdavaldið, ákæruvaldið eða lögregla.

„Það hlýtur að vera öllum áhyggjuefni hvers vegna málin eru svona fá þegar mun fleiri leita til Neyðarmóttöku eða Stígamóta en kærumál segja til um. Þetta er vitaskuld úrlausnarmál fyrir fleiri en ríkisvaldið. Þetta er úrslausnarmál fyrir samfélagið í heild,“ sagði Ragna og gerði klámvæðinguna að umtalsefni. 

Hún velti upp þeirri spurningu hvort skilgreiningin á klámi væri lifandi og hvort notendur kláms forhertust eftir því sem meira af því væri neytt og spurði hvort þetta væri í lagi. Að hennar mati er mikilvægt að skoða betur hvað unnt sé að gera þegar búið er að fremja glæpinn. „Eitt brýnasta úrlausnarefni okkar nú er að finna saman leiðir til að bæta málsmeðferðina í kynferðisbrotamálum.

Okkur er það öllum hollt að endurskoða og endurmeta það kerfi og verklag sem við höfum sett okkur um meðferð og rannsókn þessara mála í ljósi reynslunnar. Því það má ekki verða þannig að kerfið tálmi, seinki eða jafnvel komi í veg fyrir að brot gegn svo mikilsverðum grundvallarréttindum rati til dómstóla.  Við sem samfélag höfum ekki efni á því að slíkt geti átt sér stað.“

Á ráðstefnu Stígamóta fluttu erindi rithöfundur, talskona Stígamóta, sálgreinir, jafnréttishönnuður, hæstaréttarlögmaður, lögreglustjórinn í Reykjavík, ríkissaksóknari og settur héraðsdómari. Líflegar umræður mynduðust að erindum loknum.

Nánar er fjallað um ráðstefnuna í Morgunblaðinu á morgun.