Undirritaður var í dag á Höfn í Hornafirði þjónustusamningur milli Heilbrigðisstofnunar Suðurlands (HSu) og Heilbrigðisstofnunar Suðausturlands (HSSA) sem felur í sér samstarf um læknisþjónustu, símsvörun og fleiri þætti. Þetta kemur fram í tilkynningu frá samningsaðilum.

Samkvæmt samningnum mun barnalæknir frá HSu starfa á HSSA tvo daga í mánuði. Ennfremur verður HSSA aðili að samningi um símaþjónustu á nóttunni. Frá kl. 24.00-08.00 verður sameiginleg símsvörun, þar sem hjúkrunarfræðingar vísa símanum áfram til vakthafandi læknis ef þörf er á læknisaðstoð. Allar blóðrannsóknir, sem ekki eru gerðar á Höfn, en hægt er að gera á Rannsóknadeild HSu á Selfossi verða sendar þangað.

Að sögn aðstandenda kemur þjónustusamningur til með að bæta þjónustu á HSSA, en gerir HSu jafnframt kleift að festa barnalækni í fullu starfi og styrkja og auka starfsemi rannsóknardeildar stofnunarinnar.

Þá verður tekið upp samstarf um fræðslumál og munu starfsmenn HSSA meðal annars hafa aðgang að fræðslufundum HSu og geta fylgst með auglýsingum um þá í gegnum innra net HSu.

Í samningnum er ennfremur kveðið á um, að við bráðaflutning sjúklinga á svæðinu milli Hafnar og Kirkjubæjarklausturs verði boðaður sá sjúkrabíll, sem næstur er hverju sinni, í fullu samráði við Neyðarlínuna.