Tveir íslenskir krakkar  munu leiða lið Manchester United inn á völlinn á Old Trafford í Manchester í kvöld en þá fer fram síðari leikur Manchester United og AC Milan í 16 liða úrslitum Meistaradeildarinnar í knattspyrnu. Þetta eru þau Rakel Marín Konráðsdóttir og Viktor Blær Hafþórsson sem bæði eru 7 ára gömul.

Á annað hundrað Íslendingar eru mættir til Manchester til að fylgjast með leiknum, en íslenski Manchester-klúbburinn efndi til sérstakrar hópferðar á völlinn. Leikurinn þykir sögulegur því að þetta er í fyrsta sinn sem að David Beckham snýr aftur á sinni gamla heimavöll og etur kappi við félagið þar sem hann ólst upp.

Rakel Marín Konráðsdóttir og Viktor Blær Hafþórsson voru valin úr hópi á annað þúsund íslenskra barna sem sóttu um í sérstöku forvali Kreditkorts hf, en fyrirtækið er í samstarfi við Mastercard sem er einn af styrktaraðilum Meistaradeildarinnar.

Krakkarnir leggja bæði stund á íþróttir. Rakel æfir fótbolta hjá Stjörnunni og Viktor æfir með knattspyrnudeild ÍR. Þau eru í fylgd forráðamanna sinna í Manchester, en vegna mikilla öryggisráðstafanna munu foreldrarnir aðeins geta fylgt þeim að því svæði þar sem búningsklefarnir eru. Þar munu þau hitta fyrir börn frá ýmsum löndum Evrópu og í ljós kemur hvaða fótboltastjarna leiðir þau inn á völlinn fyrir framan ríflega 60.000 áhorfendur og  tugmilljónir sjónvarpsáhorfenda.

Eftirvæntingin hjá krökkunum mun vera orðin mjög mikil. Rakel hefur sagst vilja leiða Wayne Rooney, en hann er uppáhaldsleikmaðurinn hennar hjá Manchester United. Viktor hefur hingað til haldið með Arsenal. Afi hans hefur þó lengi reynt að fá hann til að skipta yfir í Manchester United. Væntanlega mun sú upplifun að fylgja þessu sögufræga fótboltaliði inn á völlinn í svo mikilvægum leik hafa einhver áhrif á það hvaða liði Viktor ákveður að halda með í framtíðinni. Leikurinn hefst kl.19:45 í kvöld.