mbl.is

Hæstiréttur hefur staðfest úrskurð Héraðsdóms Reykjavíkur um að fréttastjóri og fréttamaður Stöðvar 2 fái ekki að leiða vitni fyrir dóm til að gefa skýrslu einslega fyrir dómara og  án þess að nafn vitnisins yrði tilgreint í dómi eða gefið upp öðrum en dómara og votti. 

Um er að ræða heimildarmann frétta, sem Stöð 2 flutti í vetur um fjármagnsflutninga Björgólfs Thors Björgólfssonar, Björgólfs Guðmundssonar og Magnúsar Þorsteinssonar en þeir hafa allir höfðað meiðyrðamál gegn  Gunnari Erni Jónssyni, fréttamanni, og Óskari Hrafni Þorvaldssyni, fréttastjóra, vegna fréttanna.

Fram kemur í dómi Hæstaréttar, að fréttamennirnir beri því við, að fréttirnar séu réttar og styðjist við frásögn heimildarmanns, en sem fréttamenn megi þeir hvorki nafngreina hann né vilji þeir gera það. Því vilji þeir fá að leiða þennan heimildarmann fyrir dóm til skýrslugjafar án þess að fram komi hver hann er.

Hæstiréttur segir, að þótt lög geri ráð fyrir að nafnleyndar verði í undantekningartilvikum gætt um vitni, sem kemur fyrir dóm, sé sú heimild háð því, að dómari fallist á að lífi, heilbrigði eða frelsi vitnisins eða náins vandamanns þess yrði stefnt í hættu ef það yrði gert uppskátt hvert vitnið sé. „Því hefur ekki verið borið við í málinu að atvik séu hér með þeim hætti," segir Hæstiréttur, sem hafnar kröfu fréttamannanna.