Hæstiréttur hefur dæmt að maður, sem ekki fékk skólavist í Lögregluskólanum vegna þess að hann hafi verið of gamall, eigi rétt á bótum vegna þess að valnefnd skólans hefði ekki gætt jafnræðis þegar hún gerði upp á milli mannsins og annars umsækjanda, sem einnig var of gamall en fékk undanþága.

Maðurinn, Davor Davíð Purušić, sótti um skólavist árið 2005 þegar hann var 39 ára. Davor er íslenskur ríkisborgari og fluttist til Íslands árið 1993 frá Bosníu. Þar hafði hann starfað sem lögreglumaður en hann slasaðist í átökum sem  urðu þegar serbneski herinn réðst inn í Bosníu. 

Davor sótti um að fá að þreyta inntökupróf í Lögregluskóla ríkisins vorið 2005, en var hafnað þar sem hann fullnægði ekki almennu skilyrði um hámarksaldur, sem þá var 35 ár. Með úrskurði dóms- og kirkjumálaráðuneytisins árið 2007 var komist að þeirri niðurstöðu að valnefnd hefði ekki gætt jafnræðis er hún með ólögmætum hætti hefði gert upp á milli Davors og annars umsækjanda við veitingu undanþágu frá þessu skilyrði.

Davor höfðaði skaðabótamál á hendur ríkinu og taldi bæði Héraðsdómur Reykjavíkur og Hæstiréttur að ríkið væri bótaskylt. Skilyrðum um hámarksaldur var breytt og átti Davor þess því kost að sækja um skólavist ári síðar en gerði það ekki heldur hóf nám í viðskiptalögfræði við háskólann á Bifröst og stundar nú meistaranám þar.

Héraðsdómur dæmdi ríkið til að greiða Davor 2,3 milljónir króna í bætur en Hæstiréttur segir að ólögmæt synjun valnefndar á umsókn hans hefði hvað sem öðru liði ekki geta orðið þess valdandi að það drægist meira en eitt ár að hann gæti hafið störf innan lögreglunnar.

Segir Hæstiréttur, að þegar litið sé til þess hversu lítill munur sé á mánaðartekjum í því starfi sem Davor gegndi og þeim störfum sem hann hugsanlega hefði átt kost á innan lögreglunnar á því ári sem um ræddi, hefði honum ekki tekist að sýna fram á að hann hefði orðið fyrir fjártjóni vegna synjunarinnar. Hins vegar taldi Hæstiréttur að Davor ætti rétt á 300.000 króna miskabótum.