Dómsuppkvaðning í mansalsmálinu í Héraðsdómi Reykjaness. Ómar Óskarsson

Hæstiréttur staðfesti í gær úrskurð Héraðsdóms Reykjaness yfir tveimur Litháum sem dæmdir voru í fimm ára fangelsi fyrir mansal  fyrr í vikunni.  Fimm Litháar voru dæmdir í málinu og voru þeir allir úrskurðaðir í gæsluvarðhald til 5. apríl, eða þar til áfrýjunarfrestur dómsins rennur út.

Þrír þeirra kærðu ekki úrskurð héraðsdóms þar að lútandi en þeir hafa allir setið í gæsluvarðhaldi frá því í október. Lögreglustjóri vísaði til hættumats greiningardeildar ríkislögreglustjóra þegar hann óskaði eftir því að mennirnir yrðu látnir sitja áfram í gæsluvarðhaldi. Kom fram í hættumatinu að vitnum í málinu  stafi hætta af mönnunum. Eins sé hætta  á því að þeir muni reyna að komast úr landi eða leynast eða koma sér með öðrum hætti undan málssókn.

Mönnunum var meðal annars gefið að sök að hafa brotið gegn 19 ára litháenskri stúlku og hún hafi verið beitt ólögmætri nauðung, frelsissviptingu og ótilhlýðilegri aðferð áður en og þegar hún var send til Íslands, sem og í meðförum mannanna, sem tóku við stúlkunni hér á landi, fluttu hana og hýstu í því skyni að notfæra sér hana kynferðislega.

Rökstuddur grunur liggur fyrir um að mennirnir tengist glæpasamtökum í Litháen. Taldi greiningardeild ríkislögreglustjóra, að stúlkunni og fleiri vitnum stafaði veruleg hætta af mönnunum yrðu þeir látnir lausir.