Ósammála um lán til Íslands
Jonas Gahr Støre, utanríkisráðherra Noregs. RONEN ZVULUN
Fyrir fundinn hafði Jonas Gahr Støre, utanríkisráðherra Noregs, sagt að Noregur legðist ekki gegn áframhaldandi lánveitingum í tengslum við efnahagsáætlun Íslands hjá Alþjóðagjaldeyrissjóðnum svo framarlega sem ljóst væri að Ísland uppfyllti skilyrði sem þar eru sett.
Hann sagði ráðherrana hafa rætt stuttlega um afstöðu Norðurlandanna á fundinum og að þau hefðu ekki sömu skoðun og Noregur á því að lánveitingar héldu áfram með Alþjóðagjaldeyrissjóðnum þrátt fyrir Icesave. Slík afstaða væri í samræmi við það sem ákveðið hefði verið á þingi í Danmörku og Svíþjóð, enda kæmi það fram í viðhorfi sem ráðherrar landanna hefðu lýst til Icesave-málsins.
Støre sagðist hafa ítrekað, að af Noregs hálfu væri mikilvægt að Ísland uppfyllti sínar alþjóðlegu skuldbindingar líkt og tekið væri fram í lánasamningnum og að það fylgdi eftir efnahagsáætlun Alþjóðagjaldeyrissjóðsins.
Þá segist Støre hafa hvatt til þess að Norðurlöndin reyndu að samræma afstöðu sína í þessu máli.
Fram kemur í tilkynningu frá utanríkisráðuneytinu, að Össur Skarphéðinsson, utanríkisráðherra, hafi á fundinum gert ítarlega grein fyrir stöðunni í Icesave-málinu í kjölfar þjóðaratkvæðagreiðslunnar um liðna helgi og stöðu viðræðna Íslendinga við Breta og Hollendinga. Þá hafi hann rætt efnahagsáætlun Íslands og Alþjóðagjaldeyrissjóðsins og lagti á það áherslu að ekki yrðu tafir á annarri endurskoðun áætlunarinnar og þar með lánveitingum Norðurlandanna sem hluta hennar.
Össur átti einnig fund með Lene Espersen utanríkisráðherra Danmerkur, í Kaupmannahöfn í dag þar sem Icesave-málið var meðal annars til umræðu. Segir utanríkisráðuneytið að Espersen hafi lýst yfir ríkum skilningi á sjónarmiðum Íslands og sagt að hún vonaðist eftir samkomulagi í málinu sem fyrst.
