Laugavatnsvellirnir eru umflotnir vatni og ferðalangar varaðir við að fara Gjábakkaveginn. Ljósmynd/ Bjarni Dan

Tvö útköll voru í dag hjá björgunarsveitinni Ingunni við að draga upp bíla sem voru fastir á Gjábakkavegi. Ekki var mikill snjór á veginum, en samt nægur til að hindra ferðir fólksbíla og jepplinga.

Þrátt fyrir að Gjábakkavegur  sé lokaður með slá og merktur lokaður á íslensku og ensku, láta sumir ferðalangar sér ekki segjast og freista þess að elta för mikið breyttra fjallajeppa sem fátt getur stoppað.

Ferðalanganna hefði þó beðið annar faratálmi sem ekki var fær nema fyrir fuglinn fljúgandi. Laugarvatnsvellirnir eru nefnilega umflotnir vatni þessa dagana eins og myndin ber með sér og ómögulegt að reikna út hvar vegurinn liggur.

Ekki eru mörg ár síðan að björgunarsveitin Ingunn bjargaði tveimur mönnum af þaki bíls á þessum slóðum. Þeir höfðu tekið áhættuna á að fylgja vegi sem var á kafi í vatni, en lent utanvega og bíllinn farið á bólakaf.

Rétt er að vara ferðalanga við að fara Gjábakkaveg þessa dagana.