Flugvirkjar Icelandair að störfum

„Það er ekkert að gerast og við erum bara að hugsa ráð okkar, “segir Kristján Kristinsson formaður samninganefndar flugvirkja sem segir málið nú í höndum ríkissáttasemjara og það sé hans að boða fund sjái hann tilefni til þess. Ríkissáttsasemjari sleit í dag fundi flugvirkjar og fulltrúa Icelandair og hefur ekki boðað nýjan fund.

Kristján segir mögulega lagasetningu á kjaradeilu flugumferðarstjóra og ríkisins ekki koma til með að hafa áhrif á samningaviðræður flugvirkja og Icelandair eins og er. Fari hins vegar ríkið að skipta sér af kjaramálum flugvirkja verði ekki við það ráðið, því flugvirkjar hlíti lögum eins og aðrir.

Kristján hafnar þeirri hugmynd að flugvirkjar bíði eftir niðurstöðum samninga við flugumferðarstjóra. „Við höldum bara okkar striki og þeir halda sínu striki enda erum við ekkert í þessu saman.“

Flugumferðarstjórar aflýstu í gærkvöldi fyrirhuguðum verkföllum í morgun og mánudag þegar ljóst var orðið að Alþingi myndi setja lög á verkfallið.

Kristján sagði flugvirkja hafa lækkað sig verulega frá fyrstu kröfum um 25% launahækkun, en enn bæri verulega á milli samingsaðila. Fosvarsmenn Icelandair segjast hafa boðið flugvirkjum sambærilega samninga og gerðir hafi verið við aðra starfsmenn félagsins að undanförnu.

Náist ekki kjarasamningar hafa flugvirkjar boðað til ótímabundins verkfalls hjá Icelandair frá og með 22. mars.