Á morgun heldur Sigurjón Valmundsson, sjúkraflutninga- og slökkviliðsmaður, Haítí til starfa fyrir Rauða kross Íslands.  Þar mun hann starfa við tjaldsjúkrahús norska Rauða krossins í Petit Goave, um 70 km. fyrir utan Port-au-Prince.

Í tilkynningu frá Rauða krossinum segir að för Sigurjóns marki  tímamót í samstarfi Rauða kross Íslands og Slökkviliðs höfuðborgarsvæðisins sem hafa gert með sér samkomulag um að Rauði krossinn sjái um þjálfun starfsmanna þess til þátttöku í alþjóðlegu hjálparstarfi en Slökkviliðið veiti þeim launað leyfi til neyðarstarfa.

Þá skuldbindur Slökkviliðið sig til að losa starfsmenn með sólarhringsfyrirvara þegar slík beiðni berst frá Rauða krossinum.
Rauði krossinn er  með tvö skurðlækningateymi í Petit Goave, auk þess að sinna almennri heilsugæslu á svæðinu sem varð mjög illa úti í jarðskjálftanum mikla sem reið yfir Haítí fyrir réttum tveimur mánuðum.

Er sagt að Sigurjón muni starfa bæði sem sjúkraflutningamaður fyrir Rauða kross spítalann og sem bráðatæknir við að veita sjúklingum fyrstu aðhlynningu.

Fram kemur að Sigurjón hefur starfað með Slökkviliði höfuðborgarsvæðisins síðan 1990 og hefur mikla alþjóðlega starfsreynslu, meðal annars með íslensku friðargæslunni.  Þá hefur hann um árabil starfað sem leiðbeinandi í skyndihjálp fyrir Rauða kross Íslands. Þetta er hins vegar í fyrsta sinn sem Sigurjón sinnir alþjóðlegu hjálparstarfi fyrir Rauða krossinn.