Tryggva Þór Herbertsson segir svigrúm til að taka á skuldavanda heimilanna. mbl.is/Valdís Þórðardóttir

„Þetta sýnir að það er fullt svigrúm til að taka miklu meira á skuldavanda heimilanna en menn hafa viljað vera láta,“ segir Tryggvi Þór Herbertsson, alþingismaður, um forsíðufrétt Morgunblaðsins í morgun, þar sem fram kemur að lán til viðskiptavina voru færð úr gömlu bönkunum í þá nýju á meira en helmingsafslætti í október 2008.

„Jafnframt sýnir þetta brjálæðið í því að láta fólk greiða vexti af nafnupphæðinni á meðan bankinn er með þetta bókað hjá sér á afskrifuðu verði,“ bætir Tryggvi við.

Í mars á síðasta ári lagði Tryggvi til að 20% af skuldum heimila og fyrirtækja yrðu felld niður. Slíkt myndi auka neyslu og viðskipti, þannig að hjól efnahagslífsins færu að snúast á ný. Hugmynd Tryggva var af mörgum gagnrýnd sem óraunhæf .

Færslan gefur svigrúm til aðgerða

„Þetta [sem fram kemur í frétt Morgunblaðsins í morgun] staðfestir að það hvernig lánin voru færð á milli bankanna, gefur svigrúm til að afskrifa lán einstaklinga mun meira en menn hafa viljað vera láta, eins og ég og fleiri héldum mjög stíft fram fyrir um ári síðan,“ segir Tryggvi.

Í dag hefur staða heimila og fyrirtækja þó enn versnað, segir Tryggvi, og því þyrfti nú að grípa til róttækari aðgerða til að koma hjólum efnahagslífsins af stað en þeim sem hann lagði til fyrir ári síðan. „Það var einmitt það sem ég varaði við: Við hefðum þurft að gera eitthvað þá strax, til að koma þessu af stað. Nú þyrfti sennilega að grípa til drastískari aðgerða.“